(لاہورنیوز) صوبائی ترقیاتی ورکنگ پارٹی کے اجلاس میں ترقیاتی منصوبوں کیلئے 96 ارب روپے کے فنڈز منظور کر لئے گئے۔
اجلاس کی صدارت چیئرمین پلاننگ اینڈ ڈویلپمنٹ بورڈ ڈاکٹر نعیم رؤف نے کی، لاہور ہائی کورٹ میں نئی عدالتوں کے قیام کے لیے 6 ارب 72 کروڑ کے فنڈز کی منظوری دی گئی۔دھرم پورہ میں بیچلرز ہاسٹل اور جوڈیشل ریسٹ ہاؤس کے قیام کے لیے 3 ارب 87 کروڑ ، ایم پی اے ہاسٹل میں پارکنگ مینجمنٹ سسٹم اور دیگر سہولیات کے لیے ایک ارب 14 کروڑ کے فنڈز کی منظوری دی گئی۔
جنرل بس سٹینڈ سیالکوٹ کی تعمیر کے لیے 70 کروڑ، لینڈ فل سائٹس کی نشاندہی اور اسٹیبلشمنٹ کے لیے 4 ارب 35 کروڑ، جنوبی پنجاب میں چائلڈ ہیلتھ فسیلٹیز اور چلڈرن ہسپتال ملتان میں سہولیات کی فراہمی کے لیے 6 ارب 47 کروڑ کے فنڈز کی منظوری دی گئی۔
پنجاب ڈویلپمنٹ پروگرام کے تحت مختلف شہروں میں سیوریج ، سولنگ اور سیلابی پانی کے ڈرینج سسٹم کے لیے 73 ارب کے فنڈز منظور کیے گئے، فنڈز سے سرگودھا، گجرات، خوشاب ، قصور اور شیخوپورہ میں ترقیاتی کام کئے جائینگے
میانوالی، منڈی بہاؤالدین، حافظ آباد اور ننکانہ صاحب کے اضلاع میں بھی ترقیاتی کام ہوں گے، فنڈز کی منظوری صوبائی ترقیاتی ورکنگ پارٹی کے 32 ویں اجلاس میں دی گئی۔اجلاس میں سیکرٹری پی اینڈ ڈی بورڈ رفاقت علی نے شرکت کی، ممبران پی این ڈی بورڈ اور متعلقہ سیکٹرز کے افسران بھی اجلاس میں شریک ہوئے۔
