(لاہور نیوز) رائیونڈ کے علاقے میں معمولی تلخ کلامی نے سنگین صورت اختیار کر لی جب جھگڑے کے دوران فائرنگ کا واقعہ پیش آیا، جس کے نتیجے میں ایک شخص زخمی ہو گیا۔
پولیس کے مطابق فائرنگ کے واقعے میں محمد ساجد نامی شخص کو ٹانگ پر گولی لگی، واقعہ اس وقت پیش آیا جب دو افراد کے درمیان معمولی بات پر جھگڑا شروع ہوا جو دیکھتے ہی دیکھتے شدت اختیار کر گیا۔
فائرنگ کرنے والا ملزم جھگڑے کے بعد موقع سے فرار ہو گیا، واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر شواہد اکٹھے کرنا شروع کر دیئے۔
زخمی محمد ساجد کو فوری طور پر طبی امداد کیلئے قریبی ہسپتال منتقل کر دیا گیا ہے جہاں اس کی حالت خطرے سے باہر بتائی جا رہی ہے۔
پولیس نے واقعے کی تفتیش شروع کر دی ہے اور ملزم کی شناخت کیلئے قریبی سی سی ٹی وی کیمروں کی فوٹیج حاصل کی جا رہی ہے۔
