(لاہور نیوز) پنجاب کے بڑے دریاؤں میں سیلابی صورتحال نے خطرناک شکل اختیار کر لی ہے۔

ترجمان پی ڈی ایم اے کے مطابق دریائے ستلج، چناب اور راوی میں مختلف مقامات پر انتہائی اونچے درجے کے سیلاب کی صورتحال برقرار ہے، جبکہ دیگر مقامات پر پانی کا بہاؤ مسلسل بڑھ رہا ہے۔

ترجمان کے مطابق دریائے ستلج گنڈا سنگھ والا کے مقام پر پانی کا بہاؤ 3 لاکھ 19 ہزار کیوسک ہے جو انتہائی اونچے درجے کا سیلاب ہے، دریائے ستلج سلیمانکی پر 1 لاکھ 35 ہزار کیوسک کے ساتھ اونچے درجے کا سیلاب جاری ہے، دریائے چناب مرالہ پر پانی کا بہاؤ 84 ہزار کیوسک ریکارڈ کیا گیا، خانکی اور قادرآباد کے مقامات پر دریائے چناب میں 1 لاکھ 47 ہزار کیوسک کے ساتھ نچلے درجے کا سیلاب ہے۔

اس کے علاوہ ہیڈ تریموں پر صورتحال سب سے زیادہ سنگین ہے جہاں پانی کا بہاؤ 5 لاکھ 43 ہزار کیوسک ہے جو انتہائی اونچے درجے کا سیلاب ظاہر کرتا ہے، دریائے راوی جسڑ پر 45 ہزار کیوسک کے ساتھ نچلے درجے کا سیلاب، جبکہ شاہدرہ پر 90 ہزار کیوسک کے ساتھ اونچے درجے کا سیلاب ہے، بلوکی ہیڈ ورکس پر 1 لاکھ 39 ہزار کیوسک اور ہیڈ سدھنائی پر 1 لاکھ 23 ہزار کیوسک کے ساتھ بھی شدید سیلابی کیفیت ہے۔

ڈی جی پی ڈی ایم اے عرفان علی کاٹھیا کے مطابق 9 ستمبر تک دریائے راوی، ستلج اور چناب میں انتہائی اونچے درجے کے سیلاب کا خدشہ ہے، بالائی علاقوں میں جاری شدید بارشوں کے باعث دریاؤں کے بہاؤ میں غیر معمولی اضافہ ہو سکتا ہے۔

ڈی جی پی ڈی ایم اے نے بتایا کہ وزیراعلیٰ پنجاب کی ہدایات کے تحت تمام متعلقہ ادارے ہائی الرٹ پر ہیں اور نشیبی علاقوں میں نگرانی بڑھا دی گئی ہے، شہریوں کی جان و مال کے تحفظ کیلئے تمام وسائل بروئے کار لائے جا رہے ہیں۔

Subscribe Lahore News on YouTube

Install our App