(لاہور نیوز) ایف آئی اے لاہور زون نے انسانی سمگلرز کے خلاف کارروائیوں کا دائرہ مزید وسیع کرتے ہوئے جوہر ٹاؤن میں ایک کنسلٹنسی پر چھاپہ مار کر غیر قانونی ٹریول ایجنٹ آفتاب الرحمان کو گرفتار کر لیا۔
ایف آئی اے کی ٹیم نے مخبری پر چھاپہ مار کر آفتاب الرحمان کو حراست میں لیا، چھاپے کے دوران 31 پاکستانی پاسپورٹس، 25 موبائل فونز،متعدد حساس دستاویزات، متاثرین سے وصول شدہ 8 لاکھ 7 ہزار روپے نقدی اور اہم امیگریشن کاغذات برآمد کر لئے۔
ابتدائی تفتیش میں ملزم آفتاب الرحمان ایف آئی اے کو برآمد شدہ پاسپورٹس کی بابت تسلی بخش وضاحت دینے میں ناکام رہا، ملزم کے قبضہ سے برآمد شدہ سامان سے انسانی سمگلنگ میں ملوث ہونے کے واضح شواہد ملے ہیں۔
ترجمان ایف آئی اے کے مطابق ملزم کو گرفتار کر کے تفتیش کا آغاز کر دیا گیا ہے تاہم اس کی نشاندہی پر مزید گرفتاریاں بھی متوقع ہیں۔
