(لاہور نیوز) پاکستان کی فضائی حدود بھارتی طیاروں کے لئے تاحال بند رہی۔

بھارتی پروازوں کے لئے پاکستانی فضائی حدود کی بندش کو 22 روز ہو گئے، گزشتہ 21 روز کے دوران 2300 سے زائد بھارتی پروازیں متاثر ہوئیں، بھارتی ایئرلائنز کو گزشتہ 21 روز میں 460 کروڑ بھارتی روپے سے زائد کا جھٹکا لگا۔

ایئر انڈیا، آکاسا ایئر، سپائس جیٹ، اندیگو ایئر، ایئر انڈیا ایکسپریس کی پروازیں متاثر ہوئیں، پاکستان کی فضائی حدود کی بندش سے بھارتی طیاروں کو تاحال آدھے بھارت سے ہو کر بحیرہ عرب سے جانا پڑ رہا ہے، بھارتی ایئرلائنز کو لمبے روٹس سے گزرنے پر فیول اور دیگر آپریشنل اخراجات دگنے ہونے پر اب تک کروڑوں کا نقصان ہو چکا ہے۔

اندیگوایئرکا تاشقند اور الماتی کے لئے پروازوں کا فلائٹ آپریشن تاحال بند ہے، دہلی امرتسر، ممبئی، احمد آباد بنگلور سمیت دیگر بھارتی شہروں سے جانے والی بھارتی ایئرلائنز کو شدید نقصان ہو چکا، دہلی سے امریکا، یورپ، برطانیہ کی بھارتی ایئرلائنز کی پروازوں کو بھاری نقصان ہوا۔

بھارتی مسافر دیگر ایئرلائنز میں سفر کرنے لگے ہیں، لمبے روٹ کی پروازوں کے بھارتی ایئرلائنز عملہ کو یورپ میں تبدیل کرنا پڑ رہا ہے، دگنے فیول اور لینڈنگ سے بھارتی ایئرلائنز کو ایئرپورٹ چارجز کی مد میں بھی یومیہ کروڑوں کی ادائیگی سے بڑا نقصان ہو رہا ہے۔

پروازوں کی منسوخی سے بھارتی مسافروں کو ایئرانڈیا، انڈیگو ایئر، آکاسا ایئر، انڈیا ایکسپریس، سپائس جیٹ سمیت دیگر ایئرلائنز سے ریفنڈز نہ مل سکے، پاکستانی فضائی حدود کی بندش سے بھارتی پروازوں کا دورانیہ دگنا ہونے سے بھارتی مسافروں کو شدید پریشانی کا سامنا کرنا پڑ رہا ہے۔

Follow Lahore News on X

Install our App