وزیر اعلیٰ مریم نواز شریف سے رکن پنجاب اسمبلی سردار محمد عاصم شیر میکن اور خرم خان ورک نے بھی ملاقات کی، باہمی دلچسپی کے امور، سیاسی صورتحال اور فلاح عامہ کے منصوبوں پر تبادلہ خیال کیا گیا۔

ملاقات میں ملکی و سیاسی امور، بجٹ اور ترقیاتی منصوبوں پر بات چیت، وزیر اعلیٰ مریم نواز  نے سپیکر ملک محمد احمد خان کو پنجاب اسمبلی امور بطریق احسن سرانجام دینے پر سراہا۔

سپیکر پنجاب اسمبلی نے وزیر اعلیٰ پنجاب کو اپنی چھت، اپنا گھر پروگرام میں ریکارڈ گھر بنانے پر مبارکباد دی اور کہا کہ طلبہ کے لئے وزیر اعلیٰ مریم نواز شریف کے ہونہار سکالر شپ اور لیپ ٹاپ پراجیکٹس کو سراہتے ہیں۔

رکن پنجاب اسمبلی محمد عاصم شیر میکن  نے کہا کہ وزیر اعلیٰ مریم نواز کی ترقیاتی منصوبوں میں ارکان صوبائی اسمبلی سے مشاورت قابل تحسین ہے، سرگودھا میں محمد نوازشریف انسٹیٹیوٹ آف کارڈیالوجی پراجیکٹ اپنی مثال آپ ہے۔

محمد عاصم شیر میکن  نے وزیر اعلیٰ مریم نواز کی محمد نواز شریف انسٹیٹیوٹ آف کارڈیالوجی پراجیکٹ میں دلچسپی کو سراہا جبکہ رکن پنجاب اسمبلی خرم خان ورک نے صوبے میں ریکارڈ ترقیاتی پراجیکٹس شروع کرنے پر خراج تحسین پیش کیا۔

اس موقع پر مریم نواز کا کہنا تھا کہ تاریخ گواہ ہے کہ جب بھی مسلم لیگ ن کی حکومت آتی ہے تو لوگوں کے مسائل حل ہوتے ہیں، پورے پنجاب میں ترقیاتی کاموں کا جال بچھا دیا ہے۔

مریم نواز کا کہنا تھا کہ صحت، تعلیم، انفراسٹرکچر اور ماحولیاتی آلودگی جیسے اہم شعبوں پر حکومت کام کر رہی ہے، عوامی خدمت کے سفر کو مزید تیزی سے آگے بڑھائیں گے۔

وزیر اعلیٰ پنجاب نے کہا کہ پورے صوبے میں روٹی کی قیمت دیگر صوبوں سے کم ہے جبکہ موجودہ حکومت کسانوں کے مسائل کو ترجیحی بنیادوں پر حل کر رہی ہے۔