(لاہور نیوز) پاکستان اور ازبکستان کے درمیان مختلف شعبوں میں تعاون کی مفاہمتی یادداشتوں اور معاہدوں پر دستخط ہوئے ہیں۔

ازبکستان کے دارالحکومت تاشقند میں دونوں ممالک کے درمیان مفاہمتی یادداشتوں اور معاہدوں کی تقریب منعقد ہوئی جس میں وزیراعظم شہباز شریف اور ازبک صدر شوکت مرزا یوف نے شرکت کی۔

تقریب میں تاشقند اور لاہور کے درمیان ایم او یو کا تبادلہ ہوا، پاکستان اور ازبکستان کے درمیان معلومات کے تبادلے اور سائنس و ٹیکنالوجی میں تعاون کی مفاہمتی یادداشتوں پر دستخط کئے گئے، پاکستان اور ازبکستان کے درمیان نوجوانوں کے امور سے متعلق ایم او یو کا بھی تبادلہ ہوا۔

وزیراعظم شہباز شریف اور ازبکستان کے صدر شوکت مرزا یوف نے تقریب کے مشترکہ اعلامیے پر دستخط کئے، اس موقع پر وزیراعظم شہباز شریف نے ازبک صدر شوکت مرزا یوف کو دورہ پاکستان کی دعوت بھی دی جو انہوں  نے قبول کر لی۔

افغان سرزمین پاکستان سمیت کسی ملک کیخلاف استعمال نہیں ہونی چاہئے: وزیراعظم

اس موقع پر تقریب سے خطاب کرتے ہوئے وزیراعظم شہباز شریف کا کہنا تھا کہ دورہ ازبکستان کے دوران بہترین میزبانی پر مشکور ہوں، دونوں ممالک کے درمیان مضبوط روابط قائم ہیں، پاکستان اور ازبکستان کے تعلقات کی طویل تاریخ ہے، دونوں ملکوں کے تعلقات درست سمت میں آگے بڑھ رہے ہیں۔

وزیراعظم  نے کہا کہ سرمایہ کاری اور تجارت میں اضافہ دونوں ملکوں کے مفاد میں ہے، ازبکستان، پاکستان کا قابل اعتماد شراکت دار ہے، دونوں ممالک کی خوشحالی اور ترقی ہمارا مشترکہ عزم ہے، صدر شوکت مرزا یوف عملی اقدامات پر یقین رکھتے ہیں، ازبک صدر نے ازبکستان کو ترقی کی نئی بلندیوں پر پہنچایا ہے۔

شہباز شریف کا کہنا تھا کہ دونوں ممالک کے تعلقات کو مزید فروغ دینے کے خواہاں ہیں، نواز شریف کی ترقی کے ویژن پر عمل پیرا ہوں، پاکستان کی معیشت مستحکم ہو رہی ہے، مہنگائی میں کمی آرہی ہے، پاکستان کی آئی ٹی برآمدات میں اضافہ ہو رہا ہے، پاکستان کی معاشی ترقی کیلئے پُرعزم ہیں، انتھک محنت اور عزم سے ہی ترقی کا سفر طے کیا جا سکتا ہے۔

وزیراعظم کا کہنا تھا کہ ازبک صدر سے خطے اور مشرق وسطٰی کی صورتحال پر بات ہوئی، افغان سرزمین پاکستان سمیت کسی ملک کیخلاف استعمال نہیں ہونی چاہئے، پاکستان اور ازبکستان کے درمیان بات چیت آگے بڑھانے کیلئے وفد آج یا کل تاشقند پہنچے گا، ازبک صدر کو بھی وفد پاکستان بھیجنے کا کہا ہے۔

ازبک صدر کا پاکستان کیساتھ تجارتی حجم 2 ارب ڈالر تک بڑھانے کا اعلان

ازبک صدر شوکت مرزا یوف کا کہنا تھا کہ وزیراعظم شہباز شریف کو خوش آمدید کہتے ہیں، دونوں ملکوں کے درمیان مفید گفتگو ہوئی، روشن مستقبل کیلئے دونوں ملکوں کی گفتگو اور معاہدے بہت اہم ہیں، درپیش چیلنجز سے نمٹنے کیلئے مشترکہ لائحہ عمل اور مواقع سے فائدہ اٹھایا جائے گا۔

انہوں  نے کہا کہ پاکستان کے خوشحال مستقبل کیلئے نیک تمناؤں کا اظہار کرتا ہوں، دونوں ملکوں کے تعلقات میں وقت گزرنے کے ساتھ بہتری آ رہی ہے، پاکستان کی ممتاز کاروباری کمپنیاں دورہ تاشقند پر ہیں، سرمایہ کاری و تجارت کے حوالے سے سیر حاصل گفتگو ہو رہی ہے۔

ازبک صدر کا مزید کہنا تھا کہ دونوں ملکوں کے درمیان تزویراتی تعلقات کے نئے باب کا آغاز ہو رہا ہے، بات چیت کے بعد دونوں ملکوں نے مفاہمتی یادداشتوں اور معاہدوں پر دستخط کئے، دونوں ملکوں کے درمیان تجارتی حجم 2 ارب ڈالر تک بڑھایا جائے گا، علاقائی و عالمی فورمز پر ایک دوسرے سے تعاون جاری رکھیں گے۔

Subscribe Lahore News on YouTube

Install our App