(لاہور نیوز) محکمہ وائلڈ لائف نے شیروں کی ملکیت اور پرورش کیلئے سخت قوانین متعارف کروا دیئے۔
شیر پالنے کے شوقین افراد کیلئے نئے ضابطے متعارف کرا دیئے گئے، اب شیر رکھنے کے لئے مخصوص شرائط پوری کرنا لازم ہو گا، بصورت دیگر قانونی کارروائی کیلئے تیار رہیں۔
وائلڈ لائف حکام کے مطابق شیر کا پنجرہ کم از کم 500 مربع میٹر کا ہونا لازمی قرار دیا گیا، شیر کیلئے مالکان کو 50 ہزار روپے لائسنس فیس ادا کرنا ہو گی۔
اگر کوئی پرائیویٹ فارم شیر حاصل کرتا ہے تو اسے محکمہ وائلڈ لائف سے باقاعدہ رجسٹرڈ کروانا ہو گا، نہ صرف شیر کے مالک بلکہ اس کی خرید و فروخت کرنے والے نجی فارم کو بھی قانونی طور پر رجسٹریشن کروانا ضروری ہو گا۔
ڈپٹی ڈائریکٹر وائلڈ لائف غلام رسول کا کہنا ہے قانون کی خلاف ورزی کرنے والوں کے خلاف پاکستان پینل کوڈ کے تحت کارروائی کی جائے گی۔
بہتر تو یہی ہے کہ شیروں کو ان کے فطری ماحول میں رہنے دیا جائے ورنہ تمام قانونی تقاضے پورا کرنے لازم ہیں۔
