چیمپئنز ٹرافی ایونٹ کی سکیورٹی کا معاملہ، کتنے ہزار اہلکاروں کو تعینات کیا جائے گا؟جانئے
(ویب ڈیسک) پاکستان کی میزبانی میں ہونیوالے آئی سی سی چیمپئنز ٹرافی کیلئے پنجاب پولیس نے ٹیموں کی سکیورٹی فُل پروف بنانے کی تیاری شروع کردی۔
میڈیا رپورٹس کے مطابق چیمپئنز ٹرافی کے لاہور اور راولپنڈی میں شیڈول ہائی پروفائل میچز اور ٹیموں کی سکیورٹی یقینی بنانے کیلئے 12 ہزار 564 اہلکار تعینات کیے جائیں گے۔لاہور میں 7 ہزار 618 اہلکار جبکہ راولپنڈی میں 4 ہزار 535 اہلکار سکیورٹی کے انتظامات کریں گے، اسی طرح اسپیشل برانچ کے 411 اعلیٰ افسران بھی دیکھ بھال کریں گے۔
اس کے علاوہ میچز کی نگرانی اور سکیورٹی کو یقینی بنانے کیلئے پاک فوج اور رینجرز کے تعاون سے فضائی نگرانی بھی کی جائے گی۔پاکستان کرکٹ بورڈ (پی سی بی) اور حکومت کی جانب سے کھلاڑیوں کو ریاستی مہمان کا درجہ ملے گا،جن کی حفاظت اولین ترجیح ہوگی۔
اسی طرح اسٹیڈیم جانے والے تمام راستوں پر سیف سٹی کیمروں کے ذریعے نگرانی کی جائے گی تاکہ کسی بھی ناخوشگوار واقعہ سے نمٹا جاسکے۔15 میچز پر مشتمل آئی سی سی چیمپئنز ٹرافی کا ایونٹ 19 فروری سے 9 مارچ تک پاکستان میں کراچی، لاہور، راولپنڈی سمیت دبئی میں جاری رہے گا۔
ایونٹ کا میزبان پاکستان کا اپنا پہلا میچ نیوزی لینڈ کیخلاف 19 فروری کو کراچی کے نیشنل اسٹیڈیم میں کھیلے گا جبکہ روایتی حریفوں کے درمیان بلاک بسٹر ٹاکرا 23 فروری کو دبئی میں شیڈول ہے۔
