
(لاہور نیوز) برائلر مرغی کا گوشت پھر مہنگا ہونے لگا۔
یکمشت 22 روپے اضافے سے فی کلو گوشت 439 روپے ہو گیا ، زندہ برائلر کے نرخ بھی 15 روپے بڑھ گئے، فارمی انڈوں کی قیمت مستحکم رہی، فی درجن انڈے 324 روپے کی سطح پر برقرار ہیں۔
ادھر مہنگائی پھلوں کے بعد سبزیوں کو بھی سفید پوش طبقے کی دسترس سے دور کرنے لگی، سرکاری ریٹ لسٹ میں 7 سبزیوں کی قیمتوں میں مزید اضافہ ہو گیا، اوپن مارکیٹ میں ٹماٹر 220 ،شملہ مرچ 250 روپے فی کلو ہے، میتھی 80 ، کھیرا 70 ، شلجم 60 روپے فی کلو بیچے جا رہے ہیں، بھنڈی 480 اور گھیا کدو 160 روپے فی کلو فروخت کیا جا رہا ہے۔
پھلوں کی خریداری بھی انتہائی مشکل ہو گئی، سیب درجہ اول 320، فروٹر 155 روپے فی درجن بیچے جا رہے ہیں۔
شہری کہتے ہیں ہر علاقے میں اشیاء کی قیمتیں مختلف ہیں، اشیائے ضروریہ کی خریداری جیب پر بھاری پڑ رہی ہے، سرکاری ریٹ لسٹوں پر عمل درآمد نہ ہونے سے عوام کو مہنگائی کا دوہرا بوجھ برداشت کرنا پڑ رہا ہے۔