اسلام آباد سے جاری ایک بیان میں عطا تارڑ کا کہنا تھا کہ تحریک انصاف کا ردعمل مضحکہ خیز اور فلم کی سٹوری لگتی ہے، پی ٹی آئی ترجمان کو جھوٹ بولتے ہوئے شرم آنی چاہیے، عادی ملزمان کا منصوبہ ناکام رہا، چار حملہ آوروں کو گرفتار کیا گیا ہے۔

انہوں نے کہا کہ نو مئی کو شہدا کی یادگاروں کی بے حرمتی کی، اب گرفتار ملزمان کو فرار کروانے کی ناکام کوشش ہوئی، کسی کو قانون ہاتھ میں لینے کی اجازت نہیں دی جائے گی، حملہ آوروں کو قانون کے مطابق سزا دی جائے گی، حملے کے وقت گرفتار ملزمان کو اٹک جیل لیجایا جا رہا تھا۔

وزیر اطلاعات ونشریات کا کہنا تھا کہ پلاننگ کر کے پولیس وین پرحملہ کیا گیا، خیبرپختونخوا کے ایم پی اے لیاقت کے صاحبزادے کو بھی حملے میں ملوث ہونے پر گرفتار کیا گیا ہے، چار گاڑیوں میں مسلح افراد نے ٹول پلازہ کے قریب حملہ کیا، دو گاڑیوں اور اسلحےکو قبضے میں لیا گیا ہے، ایف آئی آر درج کر کے مزید گرفتاریاں عمل میں لائی جائیں گی۔

عطا تارڑ  نے کہا کہ ٹول پلازہ کی تمام سی سی ٹی وی فوٹیج موجود ہے، گینگسٹر کی طرح قیدیوں کی وین پر حملہ کیا گیا، منصوبہ سازوں کو گرفتار کیا جائے گا، حملہ کرنے والے 25 سے 30 افراد تھے، ،پولیس نے بہادری سے حملے کو ناکام بنایا۔

انہوں نے کہا کہ چار گرفتار افراد کو دو گاڑیوں سمیت تھانہ ترنول جبکہ تمام حوالاتیوں اور قیدی وینز کو پولیس لائنز منتقل کر دیا گیا، قیدی وینز کے ڈرائیور اور ہمراہ پولیس اہلکاروں سے تفتیش شروع کر دی ہے۔

وفاقی وزیر اطلاعات کا کہنا تھا کہ امریکا میں کیپٹل ہلز میں حملہ کرنے والوں کو 20، 20 سال سزا ہوئی، نومئی کے ملزمان کو اگرسزا مل گئی ہوتی تو ایسے حملے کرنے کی جرات نہ ہوتی، تشدد اور انتشار پی ٹی آئی کی تاریخ ہے، دو اہلکار حملے میں زخمی ہوئے ہیں۔