(لاہور نیوز) پنجاب کی سینئر وزیر مریم اورنگزیب نے کہا ہے کہ وزیراعلیٰ مریم نواز کی ماحول پر پالیسی دو ٹوک ہے، ماحولیاتی قوانین کی خلاف ورزی پر زیرو ٹالرنس ہے۔

سینئر صوبائی وزیر مریم اورنگزیب نے قصور کا دورہ کیا اور سموگ کا باعث بننے والے زگ زیگ ٹیکنالوجی کے بغیر چلنے والے بھٹوں کو مسمارکروا دیا۔

اس موقع پر گفتگو کرتے ہوئے مریم اورنگزیب نے کہا کہ سموگ کا سبب بننے والی ہر چیز کے خلاف کارروائی ہو گی، ماحول کو آلودہ کرنے اور سموگ پھیلانے والے بھٹے اور کارخانے بند ہوں گے۔

سینئر صوبائی وزیر کا کہنا تھا کہ پنجاب بھر میں زگ زیگ ٹیکنالوجی کے بغیر ایک بھی بھٹہ نہیں چلنے دیں گے، زگ زیگ کے معیار پر پورا نہ اترنے والا بھٹہ گرا دیا جائے گا۔

انہوں نے کہا کہ پنجاب حکومت نے ماحول دوست پالیسی کے تحت پلاسٹک بیگز پر پابندی لگائی، پنجاب بھر میں سموگ کے خلاف آپریشن جاری ہے، دھواں چھوڑنے والی گاڑیوں کو بھی چیک کیا جا رہا ہے۔

ان کا کہنا تھا کہ چند پیسے بچانے کے لیے انسانوں کو بیماریوں میں مبتلا کر دیا جاتا ہے ، نوٹسز ہوتے ہیں مگر عمل کوئی نہیں کرتا، اب کوئی رعایت نہیں ہوگی، آلودگی کا باعث بننے والے بااثر افراد کی فیکٹریوں کے خلاف بھی ایکشن لیا جا رہا ہے، ماحولیاتی قوانین کی خلاف ورزی پر زیرو ٹالرنس ہے۔

مریم اورنگزیب کا مزید کہنا تھا کہ قصور میں 640 بھٹے ماحول دوست زگ زیگ ٹیکنالوجی پر منتقل کر دیئے گئے، مزید 15 بھٹوں کو بھی جلد زگ زیگ پر منتقل کرائیں گے، لاہور، شیخوپورہ اور قصور میں چمڑہ جلانے والی فیکٹریوں کے خلاف بھی کارروائیاں جاری ہیں ، ریاست کے تمام اداروں کو مل کر اپنی ذمہ داری نبھانی ہے۔ 

Follow Lahore News on Twitter

Install our App