(لاہور نیوز) وزیراعلیٰ پنجاب مریم نواز شریف کا کہنا ہے کہ ایلیٹ فورس بھی نواز شریف اور شہبازشریف کا لگایا ہوا پودا ہے۔

ایلیٹ فورس پنجاب کی پاسنگ آؤٹ پریڈ کی  تقریب سے خطاب کرتے ہوئے  وزیراعلیٰ پنجاب مریم نواز کا کہنا تھا کہ  پاسنگ آؤٹ پریڈ میں شرکت کرکے جتنی آپ کے گھر والوں کو خوشی ہورہی ہے اتنی ہی خوشی مجھے بھی ہورہی ہے، 800 کامیاب بچے میرے سامنے کھڑے ہیں جن میں خواتین بھی ہیں ،کامیاب  ہونیوالوں کو مبارکباد پیش کرتی ہوں ۔

انہوں نے کہاکہ مجھے بطور وزیراعلیٰ آپ کی پاسنگ آؤٹ  پریڈ دیکھ کرحوصلہ ملا، میں آپ ہی میں سے ہوں،آپ کی یونیفارم پہن کر آئی ہوں، یہ وردی نہیں وہ قومی خدمت ہے جو  بہت کم بیٹوں اور بیٹیوں کے نصیب میں آتی ہے، بہترین کارکردگی دکھانے والوں میں70  خواتین بھی شامل ہیں، بہترین کارکردگی دکھانے والوں کو اپنی طرف سے کیش انعامات بھی بھجواؤں گی۔

مریم نواز کا کہنا تھا  کہ والدین نے اپنی بچیوں پر اعتماد کیا، ملک کی خدمت کیلئے وقف کیا، ایلیٹ فورس کی بچیاں بیٹوں کے شانہ بشانہ اپنے فرائض انجام دیں گی۔

 وزیراعلیٰ پنجاب نے کہا کہ  والدین اپنے بچوں کو شہید ہونے کیلئے میدان میں اتار دیتے ہیں، وہ کیا جذبہ ہوتا ہوگا کہ نوجوان خود کو شہادت کیلئے میدان میں اتارتا ہے، ایلیٹ فورس کے  85افسران جام شہادت نوش کرچکے ہیں، تمام فورسز کے شہدا ء کو خراج عقیدت پیش کرتی ہوں، قرآن کہتا ہے شہید زندہ ہیں۔

ان کا کہنا تھا کہ آئی جی پنجاب پولیس ڈیپارٹمنٹ میں مثبت تبدیلیاں لارہے ہیں، آئی جی پنجاب کو یقین دلاتی ہوں وسائل میں کمی نہیں آئے گی، جو بجٹ آئی جی پنجاب کو چاہیے ہوگا  پنجاب گورنمنٹ فراہم کرے گی۔

انہوں نے مزید کہا کہ میں نے آئی جی پنجاب کو 8جدید ترین کیمرے لے کر دیئے ہیں، وہ وقت دور نہیں جب پولیس پر لگے ہوئے دھبے ہم دھوئیں گے، وہ وقت دور نہیں جب لوگ گھروں میں سکون کی نیند سوئیں گے۔

قبل ازیں بیدیاں ٹریننگ سنٹر میں ایلیٹ فورس  پنجاب کی پاسنگ آؤٹ پریڈ تقریب کا انعقاد کیا گیا، وزیراعلیٰ پنجاب مریم نواز بطور مہمان خصوصی تقریب میں شریک ہوئیں، تقریب میں صوبائی کابینہ کے ارکان اور آئی جی پنجاب بھی شریک ہوئے جبکہ وزیراعلیٰ پنجاب نے پریڈ کا معائنہ بھی کیا۔

Follow Lahore News on Facebook

Install our App