(لاہور نیوز) آئی جی پنجاب ڈاکٹر عثمان انور نے جھنگی چوکی پر دہشتگردانہ حملہ ناکام بنانے پر پولیس جوانوں کو شاباش دی ہے۔

ترجمان پنجاب پولیس کے مطابق کالعدم تنظیم کے دہشتگردوں نے 2 ماہ بعد ایک بار پھر جھنگی پولیس چیک پوسٹ تونسہ شریف پر  حملہ کیا جسے پنجاب پولیس کے پہلے سے الرٹ جوانوں نے  3 گھنٹے بہادری سے لڑتے ہوئے ناکام بنا دیا۔

پولیس ترجمان نے بتایا کہ دہشت گرد جھنگی پولیس چیک پوسٹ پر قبضہ کر کے پولیس اہلکاروں کو یرغمال بنانا چاہتے تھے،  15 سے 20 دہشت گردوں نے رات کی تاریکی کا فائدہ اٹھا کر مختلف اطراف سے شدید حملہ کیا، دہشتگردوں نے حملے میں راکٹ لانچرز، ہینڈ گرنیڈ، لیزر لائٹ گنز سمیت جدید اسلحہ استعمال کیا۔

ترجمان نے بتایا کہ پولیس جوانوں نے  زبردست انداز میں مزاحمت کی، ایمونیشن ختم ہونے پر دہشتگرد بھاگنے پر مجبور ہوئے جبکہ پنجاب پولیس الرٹ ہے۔

اس حوالے سے آئی جی پنجاب ڈاکٹر عثما ن انور نے کہا ہے کہ دہشتگردوں کو کبھی ان کے مذموم عزائم میں کامیاب نہیں ہونے دیں گے،جھنگی چوکی پر تعینات 7 جوان بہادری سے لڑتے ہوئے زخمی ہوئے۔

انہوں نے بتایا کہ زخمیوں میں اے ایس آئی عمران، کانسٹیبلز محمد عامر، عاشق زین، رحمت اللہ، ثناء اللہ، ایلیٹ کانسٹیبل طارق شامل ہیں جبکہ شدید زخمی ایلیٹ کانسٹیبل شاہد منظور کو علاج معالجے کیلئے نشتر ہسپتال ملتان منتقل کر دیا گیا ہے۔

 پولیس ترجمان کا کہنا ہے کہ آئی جی پنجاب نے جھنگی چوکی پر تعینات پولیس جوانوں کو پوسٹ کا کامیابی سے دفاع کرنے پر شاباش دی، انہوں نے آر پی او اور ڈی پی او ڈی جی خان کو زخمی پولیس افسران اور اہلکاروں کو علاج معالجے کی بہترین سہولیات کی فراہمی کی ہدایت بھی کی۔

Follow Lahore News on Twitter

Install our App