لاہور: (فہیم حیدر) پاکستان شوبز انڈسٹری کے مقبول اداکار اسامہ خان نے اعتراف کیا ہے کہ اب تک انہیں دو بار محبت ہو چکی ہے لیکن فوری طور پر ان کا شادی کا کوئی ارادہ نہیں۔

اسامہ خان حال ہی میں دنیا نیوز کے مزاحیہ شو "مذاق رات" میں شریک ہوئے جہاں انہوں نے شوبز سمیت ذاتی زندگی پر کھل کر بات کی۔

اداکار نے بتایا کہ اداکاری سے قبل وہ چارٹرڈ اکاؤنٹنٹ کی ملازمت کرتے تھے اور اب بھی وہ ایک فرم میں ملازم ہیں۔

انہوں نے بتایا کہ ان کا آبائی تعلق پنجاب کے شوہر گوجرانوالہ سے ہے جہاں ان کا اپنا سکول بھی چل رہا ہے اور وہ اس کے اکاؤنٹس کے معاملات بھی خود دیکھتے ہیں۔

ایک سوال کے جواب میں انہوں نے بتایا کہ لوگ انہیں بدتمیز سمجھتے ہیں لیکن حقیقت میں وہ ایسے نہیں، چوں کہ میں شرمیلا اور کم بولتا ہوں اس لیے لوگ مجھے بدتمیز سمجھتے ہیں لیکن جب وہ لوگوں سے مسلسل بات کرتے ہیں تو ان کا ارادہ تبدیل ہوجاتا ہے۔

اداکار نے دعویٰ کیا کہ ان کا کبھی کوئی کرش نہیں رہا، البتہ انہیں اب تک دو بار محبت ہوچکی ہے لیکن ابھی وہ کسی سے محبت نہیں کر رہے اور نہ ہی تعلقات میں ہیں۔

اسامہ خان نے کہا کہ سوشل میڈیا پر لوگ ان کی ذاتی زندگی اور خاندان سے متعلق سوالات کرنا شروع ہوجاتے ہیں اور زیادہ تر لوگ ان سے شادی سے متعلق سوال کرتے ہیں۔

ان کا کہنا تھا کہ وہ چاہتے ہیں کہ لوگ ان سے شادی سے متعلق کوئی سوال نہ کیا کریں اور ساتھ ہی انہوں نے میزبان کے پوچھنے پر واضح کیا کہ ابھی ان کا فوری طور پر شادی کا کوئی ارادہ نہیں۔

یک طرفہ محبت کے سوال پر اسامہ خان کا کہنا تھا کہ ان کے خیال میں محبت ہوتی ہی یک طرفہ ہے اور اگر دو افراد کو بھی ایک دوسرے سے محبت ہوجائے تو بھی ایک شخص کو دوسرے سے زیادہ ہوتی ہے۔ 

Subscribe Lahore News on YouTube

Install our App