(ویب ڈیسک) قائد مسلم لیگ ن و سابق وزیراعظم میاں نوازشریف نے کہا ہے کہ نوجوان ہمارے ساتھ ہیں، ملک کو ایشین ٹائیگر بنائیں گے۔

کھڈیاں خاص میں انتخابی مہم کے آخری روز جلسہ سے خطاب کرتے ہوئے قائد مسلم لیگ ن میاں نوازشریف کا کہنا تھا کہ ہماری حکومت نہ جاتی تو یہاں پر موجود ہر شخص کےپاس اچھا روزگار ہوتا، موجودہ دور میں ہر نوجوان کو روزگار ملنا چاہئے۔

انہوں نے کہا کہ ہم نے اس دور سے باہر نکلنا ہے،ہم نے پھر سے ملک کو ایشین ٹائیگر بنانا ہے، شہبازشریف اس جذبے کو پاکستان کیلئے استعمال کرویہ پاکستان کی تقدیر بدل کررکھ دے گا۔

قائد ن لیگ کا کہنا تھا کہ کھڈیاں کی سڑکوں کو پیرس کی سڑکوں سے بہتر بنائیں گے، یہاں نوجوانوں کیلئے یونیورسٹی ہونی چاہیے، ان کے ہاتھوں میں لیپ ٹاپ اور کمپیوٹرز ہونے چاہئیں۔

نواز شریف کا کہنا تھا کہ کھڈیاں کے نوجوانوں کو ہنر سکھائیں گے اور باعزت نوکریاں بھی دیں گے، کھڈیاں میں رہنے والے نوجوانوں کیلئے سٹیڈیم بھی ہونا چاہیے تاکہ انہیں صحت مند تفریح کے مواقع میسر آ سکیں۔

قائد ن لیگ کا کہنا تھا کہ یہاں پر جب سٹیڈیم بنے گا تو میں شہبازشریف کو افتتاح کیلئے لے کر آؤں گا ، میں یہاں کے سٹیڈیم میں اوپننگ کے طور پر میچ کھیلوں گا۔

انہوں نے کہا کہ جو کہتے تھے کہ نوجوانوں کو ایک کروڑ نوکریاں ملیں گی لاکھوں گھرملیں گے، کہاں گئیں نوکریاں اور کہاں گئےگھر؟۔

نوازشریف کا کہنا تھا کہ ہمارا دور ایسا تھا کہ10 روپے کلو سبزیاں ملتی تھیں، میرے دور میں روٹی4روپے کی تھی،20 روپے میں5 روٹیاں ملتی تھیں، ہمارے دور میں 5 لاکھ روپے کی گاڑیاں ملتی تھیں۔

انہوں نے مزید کہا کہ ہم آج آخری جلسہ کھڈیاں میں کررہے ہیں، امید ہے یہاں موجود نوجوان ہمارے کندھے کے ساتھ کندھا ملا کر پاکستان کی ترقی میں ہمارا ساتھ دیں گے، نوجوانوں کا یہ جذبہ پاکستان کی ترقی کی نوید سنا رہا ہے۔

Follow Lahore News on Twitter

Install our App