(لاہور نیوز) نگران وزیراعلیٰ پنجاب محسن نقوی نے کہا ہے کہ لاہور رنگ روڈ سدرن لوپ تھری پراجیکٹ کا مجموعی طور پر 60 فیصد کام مکمل ہو چکا ہے، لاہور رنگ روڈ سدرن لوپ تھری 31جنوری کو ٹریفک کے لئے کھول دیا جائے گا۔

 وزیراعلیٰ پنجاب محسن نقوی منصوبے پر کام کی رفتار کا جائزہ لینے اڈہ پلاٹ رائیونڈ پہنچ گئے۔ وزیراعلیٰ محسن نقوی نے لاہور رنگ روڈ سدرن لوپ تھری پراجیکٹ کا تفصیلی دورہ کیا۔ وزیراعلیٰ محسن نقوی نے اڈہ پلاٹ رائیونڈ سے مراکہ ملتان روڈ تک 8 کلو میٹر طویل پراجیکٹ پر جاری تعمیراتی سرگرمیوں کا معائنہ کیا۔

 وزیراعلیٰ محسن نقوی نے پورے روٹ پرجاری کاموں، زیر تعمیر پلوں کا مشاہدہ کیا اور جلد تکمیل کیلئے ہدایات دیں۔ وزیراعلیٰ محسن نقوی نے پتھر ڈالنے کے کام کا جائزہ لیا۔ ایف ڈبلیو اوکے کرنل سمیع نے وزیراعلیٰ محسن نقوی کو پراجیکٹ پر ہونے والی پیشرفت کے بارے میں آگاہ کیا۔ وزیراعلیٰ محسن نقوی نے پراجیکٹ کی جلد تکمیل کے حوالے سے ضروری ہدایات دیں۔

 ایف ڈبلیو او کے کیمپ آفس میں اجلاس منعقد ہوا، جس میں منصوبے کے امور سے متعلق آگاہ کیا گیا۔

محسن نقوی کا کہنا ہے کہ رنگ روڈ سدرن لوپ تھری کی تکمیل سے عوام کو آمد و رفت کی بہترین سہولتیں ملیں گی، انشاء اللہ لاہور رنگ روڈ سدرن لوپ تھری پراجیکٹ 31جنوری تک مکمل ہوجائے گا، منصوبے کو اعلیٰ معیار کے ساتھ آگے بڑھایا جارہا ہے۔ صوبائی وزراء اظفر علی ناصر، بلال افضل، چیف سیکرٹری، سیکرٹری تعمیرات و مواصلات، سیکرٹری اطلاعات، کمشنر لاہور، ڈپٹی کمشنر لاہور، چیئرمین لاہور رنگ روڈ اتھارٹی، ایم ڈی نیسپاک،ایف ڈبلیو او کے حکام اور دیگر حکام بھی اس موقع پر موجود تھے۔

علاوہ ازیں نگران وزیراعلیٰ محسن نقوی نے غیر رسمی گفتگو کرتے ہوئے کہا ہے کہ اشتہاری ملزم کاغذات نامزدگی جمع نہیں کراسکتے،کل کورٹ نے کہہ دیا ہے، انتظامیہ صاف ،شفاف الیکشن کرانے کیلئے پورا کردار ادا کرے گی۔

محسن نقوی کا مزید کہنا تھا کہ سموگ بڑھی ہوئی ہے، اس پر ہم نے آج بھی میٹنگ کی ہے، بارش کیلئے بادل چاہئیں، کل بادل آرہے ہیں لیکن بادلوں کی اونچائی بہت زیادہ ہے۔

انہوں نے کہا کہ اللہ نے چاہا تو رنگ روڈ کا یہ حصہ پورا کرانے میں کامیاب ہوجائیں گے، موٹروے کا سدرن لوپ 31جنوری سے ٹریفک کیلئے کھول دیں گے، ہم نے یہاں ڈیڑھ گھنٹے کا وزٹ کیا ہے، جب فوگ زیادہ ہوتی ہے تو کام سست روی کا شکار ہوجاتا ہے، مجھے امید ہے ایف ڈبلیو او اس پراجیکٹ پر بھی ہمیں ناامید نہیں کرے گی۔

وزیراعلیٰ کا کہنا تھا کہ ہم ٹائم لائن سے بہت آگے جارہے ہیں، ہم دوڈھائی سال کا پراجیکٹ 6 ماہ میں مکمل کرلیں گے، سب سے بڑا مسئلہ موسم کا ہے، پوری موٹروے کی ٹریفک بند ہوکر امامیہ کالونی پھاٹک والی سائیڈ پر آگئی ہے۔

Subscribe Lahore News on YouTube

Install our App