(لاہور نیوز) نگران وزیراعظم کے معاون خصوصی و چیئرمین پاکستان علما کونسل علامہ طاہر اشرفی نے کہا ہے کہ مذہبی ہم آہنگی پاکستان کی ترقی کی بنیاد ہے۔

لاہور میں پریس کانفرنس کرتے ہوئے علامہ طاہر اشرفی کا کہنا تھا کہ  پاکستان مختلف مسالک کے ماننے والوں کا ملک ہے، پاکستان اقلیتوں کے حقوق کے لیے حاصل کیا گیا تھا، اس وقت کے کمزور لوگوں نے ووٹ دیا تو صوبہ پنجاب بنا، پاکستان کے تعلیم اور صحت کے میدان میں مسیحی برادری نے بڑا کردار ادا کیا۔

چیئرمین پاکستان علما کونسل کا کہنا تھا کہ جب تک تعلیم تجارت نہیں بنی تھی تب مسیحی تعلیمی اداروں نے بڑے بڑے لوگوں کو تعلیم دی، جو کردار تعلیم اور صحت کے لیے مسیحی برادری نے ادا کیا وہ قابل تحسین ہے، مذہبی ہم آہنگی پاکستان کی ترقی کی بنیاد ہے، ہمیں ایک دوسرے کو تسلیم کرنا ہے، پاکستان کی ترقی اس وقت تک نہیں ہوسکتی جب تک ہم ایک دوسرے کو تسلیم نہیں کرتے۔

انہوں نے کہا کہ پاکستان کا آئین ہے اور آئین قرآن و سنت کے تابع ہے، اسلام کا نام ہی سلامتی ہے، فلسطین کے ساتھ جو ہورہا ہے وہاں مسیحی بھی دہشت گردی کا شکار ہورہے ہیں، غزہ کے ہسپتال میں مسیحی ڈاکٹرز خدمات سر انجام دے رہے ہیں، جو انسان فلسطین کے ساتھ کھڑا ہے اس کو سلام پیش کرتے ہیں۔

ان کا کہنا تھا کہ  تمام مذاہب انسانیت کا درس دیتے ہیں، امام کعبہ،پوپ فرانسس سمیت تمام مذاہب کے لوگ امن کی بات کر رہے ہیں، ہم بھی پاکستان کے چرچ سے امن کی اپیل کر رہے ہیں، غزہ میں  3500 بچے اب تک شہید ہوچکے ہیں، اسلامی تعاون تنظیم کے فیصلوں کی تائید کرتے ہیں، اب تو یہودی بھی امن کی بات کررہے ہیں۔

علامہ طاہر اشرفی نے کہا کہ دنیا میں ترقی تعلیم اور صحت سے ممکن ہے، پاکستان میں دونوں کی ضرورت ہے، دنیا کو جنگوں کی نہیں امن کی ضرورت ہے، اس وقت دنیا میں سب سے بڑی سفارتکاری مذہبی سفارتکاری ہے، پیغام پاکستان ملک میں ایک دوسرے کے لیے جگہ دینے کا پیغام ہے۔

معاون خصوصی وزیراعظم کا مزید کہنا تھا کہ مذہب کا استعمال ذاتی مقاصد کیلئے نہیں ہونا چاہیے،ہم سب برابرہیں، ہم سب ایک ہیں، آئیں مل کر صحت ،تعلیم اورمکالمے کو فروغ دیں، دنیا میں آپ کو ڈائیلاگ ہی آگے لیکر جاسکتے ہیں۔

Follow Lahore News on Twitter

Install our App