(لاہور نیوز) ترجمان استحکام پاکستان پارٹی فردوس عاشق اعوان کا کہنا ہے کہ ہم 76 برسوں سے جاری روایتی سیاست نہیں کریں گے ۔

ترجمان استحکام پاکستان پارٹی فردوس عاشق اعوان نے پریس کانفرنس کرتے ہوئے کہا کہ ہم اپنے زور بازو پر سیاسی قوت کا مظاہرہ کریں گے، 13 اکتوبر سے عوامی رابطہ مہم کے طور پر جلسہ کرنے جا رہے ہیں، ہر جلسہ میں اگلے جلسے کا اعلان کیا جائے گا۔

انہوں نے کہا کہ ن لیگ کے دو شو ہم دیکھ چکے ہیں، شاہدرہ میں ن لیگ کے ساتھ جو ہوا وہ عوام نے بتا دیا۔

ترجمان نے کہا کہ حلقہ بندیاں سیاستدانوں سے مشاورت کے بغیر کی گئیں ہیں، حلقہ بندیوں کی حتمی فہرست جاری ہونے کے 30 دن بعد الیکشن کا شیڈول آنا چاہیئے، اگر پھر بھی الیکشن کا شیڈول نہ آیا تو ہم عوام کی آواز میں آواز ملائیں گے۔

فردوس عاشق کا کہنا تھا کہ عثمان ڈار کی ایک ٹی وی ٹاک شو میں گفتگو سنی، بعد میں ان کی والدہ کا بیان بھی آیا، عثمان ڈار نے پہلے سیالکوٹ سے پی ٹی آئی کا صفایا کروایا، ایم پی اے کی 10 نشستوں میں 2018 میں صرف ایک نشست مل سکی، سٹریٹ بوائز نے چیئرمین پی ٹی آئی کو تصادم کے بیانیے کی جانب گامزن کیا، اب عثمان ڈار وعدہ معاف گواہ بن رہے ہیں۔

انہوں نے کہا کہ ان کی والدہ کا بیان وکٹ کے دونوں طرف کھیلنے جیسا ہے، سیالکوٹ کے عوام اتنے بیوقوف نہیں ہیں کہ ڈبل وکٹ ٹورنامنٹ کو نہ جان سکیں، 9 مئی کی ڈرٹی گیم کا مین آف دی میچ چیئرمین پی ٹی آئی ہے، اب پی ٹی آئی کی روپوش قیادت قرآن اٹھا کر حلف دے رہی ہے، اگر آپ نے کوئی غلطی نہیں کی تو چھپے کیوں ہیں؟، جو لوگ بے گناہ ہیں ان کی ضمانتیں ہو رہی ہیں، جو لوگ ذمہ دار ہیں وہ اب وعدہ معاف گواہ بن رہے ہیں۔

انہوں نے مزید کہا کہ سوشل میڈیا پر بےبنیاد پروپیگنڈا کرنے والے کرداروں کو چھوڑ کر اداروں کو دیکھیں، ایپکس کمیٹی کے فیصلوں کو سراہتے ہیں، افغانیوں نے ہمیشہ پاکستان کو زخم دیئے، ،غیرقانونی مقیم غیرملکی مافیا کی شکل اختیار کر چکے ہیں۔

Follow Lahore News on Twitter

Install our App