(ویب ڈیسک) پاکستان کے سابق کرکٹر باسط علی نے کہا ہے کہ بھارت کے ہاتھوں پاکستان کو شکست کی ذمہ دار ٹیم مینجمنٹ کی حکمت عملی ہے۔

پاک بھارت میچ کے حوالے سے سابق پاکستانی مڈل آرڈر بیٹر باسط علی نے کہا کہ جہاں بارش بار بار کھیل میں مداخلت کر رہی ہو وہاں ایک روز قبل ہی ٹیم کا اعلان کردینا بے وقوفی ہے اور یہ سب بابراعظم نہیں بلکہ ٹیم مینجمنٹ کر رہی ہے۔

باسط علی نے کہا کہ پاکستان ٹیم مینجمنٹ جس میں سوائے مورکل کے کسی نے بڑی کرکٹ نہیں کھیلی ان کی غلط اور دنیا سے منفرد فیصلے کرنے کی بے وقوفانہ سوچ کی وجہ سے پاکستان کو اس صورتحال کا سامنا ہے۔ ٹیم مینجمنٹ نے ایک دن قبل ہی چار فاسٹ بولرز اور ایک سپنر کے ساتھ میدان میں اترنے کا اعلان کیا جس کو دیکھتے ہوئے بھارتی ٹیم نے ائیر جو سپنرز کو اچھا کھیلتا ہے اس بٹھا کر راہول کو کھلایا۔

سابق ٹیسٹ کرکٹر نے کہا کہ جب حریف ٹیم کو پہلے ہی پتہ چل جائے کہ کن بولرز کا سامنا ہوگا تو اس کے لیے میچ کی پلاننگ آسان ہوگی اور ہماری مینجمنٹ نے حریف کو خود یہ موقع فراہم کیا۔

ان کا مزید کہنا تھا کہ جب گزشتہ روز بھارتی بیٹرز نے سابقہ میچ کے برعکس مختلف روپ دکھاتے ہوئے تیز کھیلنا شروع کیا تو پاکستان کی جانب سے بھی کچھ مختلف ہونا چاہیے تھا۔ جب اوپنرز پاکستانی بولرز پر حاوی تھے تو حکمت عملی تبدیل کرتے ہوئے اوور کا ٹائم بڑھا کر حریف بیٹرز سے گفتگو کرکے اس کا دھیان بٹانا چاہیے تھا۔

 باسط علی نے مزید کہا کہ پارٹنر شپ صرف بیٹنگ نہیں بولنگ میں بھی ہوتی ہے سب کو پتہ ہے کہ شاہین شاہ اور نسیم ایک ساتھ آتے ہیں تو اس بولنگ پارٹنر شپ میں تبدیلی لاتے جو حریف کے لیے سرپرائز ہو سکتا تھا۔

Subscribe Lahore News on YouTube

Install our App