(لاہور نیوز) سوئی ناردرن گیس پائپ لائنز لمیٹڈ (SNGPL) کا کارپوریٹ بریفنگ سیشن لاہور سٹاک ایکسچینج پلازہ میں منعقد ہوا۔

منیجنگ ڈائریکٹر ایس این جی پی ایل عامر طفیل نے تجزیہ کاروں، سرمایہ کاروں اور شیئر ہولڈرز کو کمپنی کی کارکردگی اور اس کے مستقبل کے امکانات کے بارے میں آگاہ کیا۔

تقریب سے خطاب کرتے ہوئے کمپنی کی انتظامیہ نے شرکا کو بریفنگ دی کہ کمپنی نے پہلی دفعہ ایک کھرب روپے سے زائد کی آمدنی کا سنگ میل حاصل کیا ہے اور مزید کہا کہ کمپنی کے منافع میں 5.66 فیصد کی کمی واقع ہوئی ہے جس کی بنیادی وجہ WACC کے تحت ROA کی شرح میں تبدیلی یعنی 17.43 فیصد سے 16.6 فیصد تک کمی اور وفاقی حکومت کی جانب سے سپر ٹیکس کا نفاذ ہے۔

مزید برآں، کمپنی کی انتظامیہ نے اس بات پر روشنی ڈالی کہ کمپنی کے گیس کے نقصانات (UFG) مالی سال 2020-21 میں 8.60 فیصد سے کم ہو کر مالی سال 2021-22 میں 8.06 فیصد رہ گئے ہیں۔

توانائی کے شعبے کی صورتحال پر روشنی ڈالتے ہوئے کمپنی کی انتظامیہ نے بتایا کہ مقامی قدرتی گیس کے وسائل کی کمی کی وجہ سے اب RLNG کا حصہ گیس کی سپلائی میں تقریباً  50% ہے جو ملک میں طلب اور رسد کی صورتحال کی وجہ سے مزید بڑھ سکتا ہے۔ کمپنی کی انتظامیہ نے خاص طور پر حکومت کی کوششوں کو سراہا جن کی مدد سے توقع ہے کہ اس سال کے آخر تک سسٹم میں 100 MMCFD گیس کا حجم شامل ہو جائے گا۔

ایم ڈی ایس این جی پی ایل نے مزید بتایا کہ نئی دریافتوں میں کمپنی کے نیٹ ورک میں ولی کنویں سے گیس پہلے ہی شامل کی جا چکی ہے جبکہ شیوا کے کنویں سے مقامی قدرتی گیس رواں سال کے آخر تک داخل کیے جانے کا امکان ہے۔

کمپنی کے مستقبل کے نقطہ نظر کا اشتراک کرتے ہوئے کمپنی کی انتظامیہ نے کہا کہ کمپنی اگلے 5 سالوں کے دوران ''قدرتی گیس یوٹیلیٹی'' سے ''انرجی کمپنی'' میں تبدیل کرنے پر غور کر رہی ہے۔ اس دوران کمپنی کا مقصد مختلف اقدامات کو لاگو کرکے اپنے مرکز کی حفاظت کرنا ہے۔ کاروبار میں کمال اور جدت کا حصول اور نئے کاروباری مواقع حاصل کرکے توانائی کے شعبے میں اپنی پوزیشن برقرار رکھنا ہے۔

کمپنی کی سینئر مینجمنٹ بشمول جناب فیصل اقبال، سی ایف او؛ سید جواد نسیم، ایس جی ایم (بی ڈی)؛ جناب قیصر مسعود، ایس جی ایم (ڈی)؛ اور کمپنی سیکرٹری امتیاز محمود بھی اس موقع پر موجود تھے۔ سیشن میں تجزیہ کاروں، سرمایہ کاروں اور شیئر ہولڈرز نے ذاتی طور پر اورZoomسے بھی بڑی تعداد میں شرکت کی جنہوں نے منیجنگ ڈائریکٹر عامر طفیل کی قیادت میں کمپنی کی ٹیم کی طرف سے دی گئی بریفنگ میں گہری دلچسپی ظاہر کی۔

بریفنگ کے بعد سوال و جواب کا سیشن ہوا جس میں تمام سوالات کے منیجنگ ڈائریکٹر اور سینئر مینجمنٹ نے انتہائی مثبت انداز میں جوابات دیئے۔

Subscribe Lahore News on YouTube

Install our App