(لاہور نیوز) وزیر اطلاعات پنجاب عظمیٰ بخاری نے یومِ پاکستان کے موقع پر اپنے پیغام میں کہا ہے کہ یہ دن ”عہدِ تحفظِ پاکستان“ کے عزم کی تجدید کا دن ہے، جو ہمیں اپنے آباؤ اجداد کی عظیم قربانیوں اور جدوجہد کی یاد دلاتا ہے۔
انہوں نے کہا کہ یومِ پاکستان ہمیں اُن مضبوط ارادوں اور انتھک کوششوں کی یاد دلاتا ہے جن کے نتیجے میں برصغیر کے مسلمانوں کو صرف سات سال بعد ایک آزاد وطن نصیب ہوا، قائداعظم محمد علی جناح، علامہ محمد اقبال اور ان کے رفقاء کی بے مثال قیادت اور قربانیوں کی بدولت آج ہم ایک آزاد فضا میں سانس لے رہے ہیں۔
عظمیٰ بخاری نے کہا کہ 1940 میں پیش کیا جانے والا پاکستان کا تصور آج ایک مضبوط اور ناقابلِ تسخیر دفاعی قوت میں تبدیل ہو چکا ہے، جو ہر قسم کے خطرات کا بھرپور مقابلہ کرنے کی صلاحیت رکھتا ہے۔
انہوں نے مزید کہا کہ میاں محمد نواز شریف نے پاکستان کے دفاع کو مزید مستحکم بنانے میں اہم کردار ادا کیا، جبکہ مسلح افواج ملک کے ایک ایک انچ کے تحفظ کیلئے ہمہ وقت تیار ہیں۔
صوبائی وزیر اطلاعات نے اس عزم کا اظہار کیا کہ ملکی سلامتی اور دفاع پر کسی قسم کا کوئی سمجھوتہ نہیں کیا جائے گا اور پاکستان کو مزید مضبوط بنانے کیلئے تمام وسائل بروئے کار لائے جائیں گے۔
