(ویب ڈیسک) سوشل میڈیا کی نگرانی اور کنٹرول کیلئے نصب کیا گیا فائر وال منصوبہ ناکام ہو گیا۔
حکومتِ پاکستان نے فائیو جی سپیکٹرم کی نیلامی سے قبل فائر وال کو مستقل طور پر بند کرنے کا فیصلہ کیا ہے۔
سرکاری ذرائع کے مطابق فائر وال منصوبہ ناکام ہونے کےباعث قومی خزانے کو اربوں روپے کا نقصان برداشت کرنا پڑا، یہ فائر وال 2024 میں سوشل میڈیا کنٹرول کرنے کے مقصد سے نصب کی گئی تھی، تاہم مکمل تکنیکی تیاری کے بغیر نصب ہونے کے باعث یہ ٹیلی کام انفراسٹرکچر سے ہم آہنگ نہ ہو سکی۔
سرکاری حکام کا کہنا ہے کہ فائر وال سےمطلوبہ نتائج حاصل نہ ہونے اور انٹرنیٹ کی رفتار متاثر ہونے پر اسے مستقل طور پر بند کرنا پڑا، فائر وال کے باعث انٹرنیٹ سست روی کا شکار رہا، جس سے لاکھوں فری لانسرز اور ہزاروں کمپنیوں کی ڈیجیٹل سروسز متاثر ہوئیں،تاہم فائر وال کی بندش پر وزارت آئی ٹی نے موقف دینے سے گریز کیا۔
