14 Feb 2026
(ویب ڈیسک) اقبال ٹاؤن کے علاقے میں ایک افسوسناک واقعہ پیش آیا جہاں ایک کرایہ دار نے پولیس کی موجودگی میں خود کو آگ لگا لی۔
پولیس کے مطابق متاثرہ شہری بلال نے کرائے پر عمارت لے کر اس میں کیفے قائم کر رکھا تھا، بتایا گیا ہے کہ بلال کرایہ ادا نہیں کر رہا تھا جبکہ بجلی کا تقریباً 9 لاکھ روپے کا بل بھی واجب الادا تھا اور میٹر منقطع کیا جا چکا تھا۔
پولیس کا کہنا ہے کہ بلال نے عمارت خالی کرنے کا وعدہ کیا تھا، تاہم جب دکان کا مالک پولیس کے ہمراہ قبضہ لینے پہنچا تو بلال نے مزید مہلت طلب کی، مالک کی جانب سے مزید وقت دینے سے انکار پر بلال نے مبینہ طور پر خود کو آگ لگا لی۔
ریسکیو ٹیموں نے جھلسنے والے بلال کو فوری طور پر قریبی ہسپتال منتقل کر دیا جہاں اسے طبی امداد دی جا رہی ہے۔
پولیس کا کہنا ہے کہ واقعے کی مزید تحقیقات جاری ہیں۔
