(لاہور نیوز) پنجاب فوڈ اتھارٹی نے معروف ناشتہ پوائنٹس اور ڈیری شاپس کے خلاف میراتھن کارروائیاں کرتے ہوئے متعدد فوڈ پوائنٹس کو بند اور جرمانے عائد کر دیئے۔

کارروائیاں ایڈیشنل ڈائریکٹر جنرل آپریشنز آمنہ رفیق کی سربراہی میں گوالمنڈی، انارکلی اور گلبرگ کے علاقوں میں کی گئیں۔

تفصیلات کے مطابق 28 معروف فوڈ چینز اور ناشتہ پوائنٹس کی چیکنگ کی گئی، جہاں ناقص انتظامات اور قوانین کی خلاف ورزیوں پر ایک معروف ریسٹورنٹ اور ڈیری شاپ کو بند کر دیا گیا، قوانین کی خلاف ورزی پر 8 فوڈ پوائنٹس کو مجموعی طور پر 2 لاکھ 2 ہزار روپے کے جرمانے بھی عائد کئے گئے۔

کارروائی کے دوران بھاری مقدار میں پیزا ڈو، ایکسپائر مصالحے اور گلی سڑی سبزیاں تلف کر دی گئیں، ڈی جی فوڈ اتھارٹی عاصم جاوید کے مطابق ڈیری شاپ کو سیمپل فیل ہونے اور فوڈ قوانین کی خلاف ورزی پر بند کیا گیا۔

عاصم جاوید نے بتایا کہ ناشتہ پوائنٹس کے کچن ایریاز میں صفائی کے انتہائی ناقص انتظامات پائے گئے، جبکہ سٹوریج سیکشن میں گندا پانی کھڑا تھا اور نان فوڈ گریڈ برتنوں کا استعمال کیا جا رہا تھا، واٹر ٹیسٹنگ رپورٹس، لازم ریکارڈ، ضروری دستاویزات اور ملازمین کے میڈیکل سرٹیفکیٹس بھی موجود نہیں تھے۔

ڈی جی فوڈ اتھارٹی کے مطابق متعدد مقامات پر زنگ آلود مشینری، فنگس زدہ دیواریں اور بدبودار ماحول پایا گیا، جو انسانی صحت کیلئے خطرناک ہے، وزیر اعلیٰ پنجاب کے احکامات پر جعلساز مافیا کے خلاف شکنجہ مزید سخت کر دیا گیا ہے اور صوبے میں خوراک کے معیار پر کسی قسم کا سمجھوتہ نہیں کیا جائے گا۔

عاصم جاوید کا کہنا تھا کہ صحت دشمن عناصر کے خلاف زیرو ٹالرنس پالیسی اپنائی گئی ہے اور پنجاب فوڈ اتھارٹی ہمہ وقت فیلڈ میں متحرک ہے، انہوں  نے شہریوں سے اپیل کی کہ خوراک سے متعلق کسی بھی شکایت کی صورت میں فوری طور پر ہیلپ لائن 1223 پر اطلاع دیں۔

Follow Lahore News on Facebook

Install our App