(لاہور نیوز) پولٹری مصنوعات کی قیمتوں میں اضافے کا سلسلہ جاری ہے، جس کے باعث شہریوں کو روزمرہ کے کھانے پینے کے اخراجات میں مزید اضافے کا سامنا ہے۔
برائلر گوشت کی قیمتوں میں 22 روپے تک اضافہ دیکھنے کو ملا ہے، جس کے بعد برائلر گوشت کی قیمت 519 روپے فی کلو مقرر کر دی گئی ہے، اس کے علاوہ، صافی گوشت کی قیمت بھی 600 روپے فی کلو تک پہنچ گئی ہے، جس سے شہریوں کو خریداری میں مشکلات پیش آ رہی ہیں۔
زندہ برائلر کے نرخوں میں بھی اضافہ ہوا ہے، فارم گیٹ ریٹ میں 15 روپے تک اضافہ ہوا ہے، جس کے بعد زندہ برائلر کی قیمت 330 روپے فی کلو مقرر کی گئی ہے، ہول سیل مارکیٹ میں زندہ برائلر کی قیمت 344 روپے فی کلو تک پہنچ گئی، جبکہ پرچون بازار میں یہ قیمت 358 روپے فی کلو تک پہنچ چکی ہے۔
مزید برآں، برائلر کی قیمتوں میں صرف چار دنوں کے اندر 58 روپے کا اضافہ دیکھنے کو ملا ہے، جس سے خریداروں کی پریشانی میں مزید اضافہ ہو گیا ہے۔
انڈوں کی قیمتوں میں بھی اضافے کا رجحان دیکھنے کو ملا ہے، حالیہ دنوں میں انڈوں کی قیمت میں ایک روپے کا اضافہ کیا گیا، جس کے بعد انڈوں کی قیمت 361 روپے فی درجن مقرر کی گئی ہے، ہول سیل مارکیٹ میں انڈوں کی ایک پیٹی کی قیمت 10,710 روپے مقرر کی گئی ہے، جو کہ عوام کی قوتِ خرید سے باہر جا رہی ہے۔
