(ویب ڈیسک) پنجاب حکومت نے صوبے بھر میں ترقیاتی منصوبوں کے معیار اور رفتار کو بہتر بنانے کیلئے کڑی جانچ کے فیصلے کا اعلان کیا ہے۔

اس فیصلے کے تحت افسران، اہلکار اور ٹھیکیدار کی غفلت یا کوتاہی پر تادیبی کارروائی کی جائے گی، یہ فیصلہ سیکرٹری ہاؤسنگ نورالامین مینگل کی زیر صدارت ہونے والے ایک اہم اجلاس میں کیا گیا، جس میں وزیر اعلیٰ پنجاب کے ڈویلپمنٹ پروگرام کے تحت ترقیاتی کاموں کے آغاز پر تبادلہ خیال کیا گیا۔

اجلاس میں بتایا گیا کہ تمام ترقیاتی کاموں کو بروقت اور معیاری طور پر مکمل کروانے کیلئے افسران اور ٹھیکیداروں کو سختی سے پابند کیا جائے گا۔

سیکرٹری ہاؤسنگ نورالامین مینگل  نے اس بات پر زور دیا کہ افسران ترقیاتی کاموں کی تکمیل کیلئے بھرپور ذمہ داری کا مظاہرہ کریں گے، ٹھیکیداروں سے توقع کی جائے گی کہ وہ معیاری مواد کا استعمال کرتے ہوئے کام مکمل کریں گے تاکہ کسی قسم کی بے ضابطگی یا غیر معیاری کام نہ ہو۔

تمام ترقیاتی کاموں کی مانیٹرنگ کیلئے جیو ٹیگنگ کی جائے گی تاکہ ہر منصوبے کی پراگریس اور معیار کی نگرانی کی جا سکے، اس کے ساتھ ساتھ، کوالٹی ایشورنس کمیٹیاں بھی تشکیل دی جائیں گی جو کاموں کے معیار کی کڑی جانچ کریں گی تاکہ یہ یقینی بنایا جا سکے کہ منصوبے معیاری اور مقررہ وقت پر مکمل ہوں۔

سیکرٹری ہاؤسنگ نے مزید کہا کہ ٹھیکیداروں کو ادائیگیاں کرنے سے پہلے کام کے معیار کی جانچ کی جائے گی اور تمام ترقیاتی کام اگلے سال مون سون کے آغاز سے قبل مکمل کر لئے جائیں گے، صوبہ بھر میں بڑے پیمانے پر ترقیاتی منصوبے شروع کئے گئے ہیں اور ان کی کامیاب تکمیل سے عوام کو فائدہ پہنچے گا۔

Follow Lahore News on X

Install our App