(لاہور نیوز) پاکستانی اداکارہ رابعہ نورین اداکارعابد علی کی یاد میں ایک بار پھر آبدیدہ ہو گئیں۔

حال ہی میں دنیا نیوز کےمزاحیہ پروگرام ’مذاق رات‘ میں گفتگو کرتے ہوئے رابعہ نورین نے بتایا کہ عابد علی ان کی زندگی کا مضبوط سہارا تھے اور اُن کے جانے کے بعد بھی ان کی یادیں ہمیشہ ساتھ رہتی ہیں۔

اداکارہ کے مطابق وہ اپنے روزمرہ معمولات میں خود کو مصروف رکھتی ہیں مگر عابد علی کا ساتھ ان کے اندازِ محبت اور بولے گئے الفاظ آج تک دل میں تازہ ہیں۔
انہوں نے کہا کہ عابد علی ان کے لیے صرف ایک ہمسفر نہیں بلکہ تحفظ اور زندگی کا احساس تھے اور انسان اپنی جان سے پیاری چیز کے بغیر نہیں رہ سکتا۔

رابعہ نورین نے بتایا کہ دونوں کی پہلی ملاقات ایک فلائٹ میں ہوئی جب وہ کیبن کریو میں شامل تھیں تاہم اصل قربت کوئٹہ میں ایک ڈرامے کی شوٹنگ کے دوران بڑھی اور پھر 2006 میں دونوں نے شادی کرلی۔

عابد علی کی شخصیت پر گفتگو کرتے ہوئے انہوں نے بتایا کہ ان کے درمیان محبت کبھی زبردستی نہیں تھی، سب کچھ اپنے وقت اور فطری انداز میں ہوا، عابد علی نہایت خیال رکھنے والے محبت کرنے والے اور ہر کسی کا سوچنے والے انسان تھے، وہ شوٹنگ کے بعد پوری ٹیم کو کھانا کھلانے لے جایا کرتے تھے۔

اپنے جذباتی لمحے کا ذکر کرتے ہوئے رابعہ نورین نے بتایا کہ انہیں عابد علی سے اپنی وابستگی کا احساس اس وقت ہوا جب ایک دن انہیں وہ صبح کا میسج موصول نہیں ہوا جو دونوں چھ ماہ سے روزانہ ایک دوسرے کو بھیج رہے تھے۔

مزید بتاتے ہوئے ان کا کہنا تھا کہ ابتدا میں انہوں نے عابد علی کو بتایا کہ وہ شادی شدہ ہیں، اس لیے اس تعلق کو آگے بڑھانا مناسب نہیں مگر عابد علی نے رشتے کو ختم کرنے سے منع کرتے ہوئے کہا کہ حالات کو قدرتی طور پر اپنا راستہ بنانے دیں۔

Subscribe Lahore News on YouTube

Install our App