(لاہور نیوز) ستھرا پنجاب پروگرام میں جدت لانے کا فیصلہ، صفائی والی گاڑیاں بھی اب ماحول دوست الیکٹرک وہیکل ہونگی، کوڑے سے بھی آمدنی اور انرجی پیدا کی جائے گی، گندگی پھیلانے والے کو بھی جرمانہ ہوگا۔

وزیراعلیٰ مریم نواز شریف کی زیر صدارت خصوصی اجلاس منعقد ہوا، اجلاس میں ستھرا پنجاب کے ہر پہلو پر تفصیلی بریفنگ دی گئی اور پروگرام میں مزید جدت لانے کا فیصلہ کیا گیا ہے۔

وزیراعلیٰ مریم نواز شریف نے اجلاس میں ”ویسٹ ٹو ویلیو“پراجیکٹ کے لئے وسط جنوری تک جامع پلان طلب کر لیا۔ اب پنجاب کے ہر گلی کوچے میں ستھرا پنجاب  کی نئی لہر شروع ہوگی اور اب اتور کو بھی پنجاب میں صفائی ہوگی۔

وزیراعلیٰ مریم نواز نے اجلاس میں ستھرا پنجاب کی روایتی گاڑیوں کی جگہ الیکٹرک وہیکل متعارف کرانے کا حکم دیا جبکہ پنجاب میں کمرشل ایریاز اور سڑک پر گندگی پھیلانے والے قانون کے شکنجے میں آئیں گے اور جرمانے ہونگے۔

پنجاب میں ہر گندگی پھیلانے والا 15 دن کے بعد قانون کی گرفت میں آئے گا۔ صوبے میں پہلی مرتبہ اتوار کے روز بھی صفائی کے لئے عملہ تعینات کرنے کا فیصلہ کیا گیا ہے۔

پنجاب نے روایتی جھاڑو کو بھی الوداع کہہ دیا، اب ستھرا پنجاب کے ہیروز جدید مکینیکل سوئپراستعمال کریں گے۔ ستھرا پنجاب کے تحت ہر یونین کونسل میں صفائی کے ہیروز کی تعداد بھی بڑھائی جائے گی۔

اجلاس میں پنجاب کی ہر دو یونین کونسل کو صفائی کیلئے ایک ٹریکٹر دینے کی تجویز کا جائزہ لیا گیا۔ اس کے علاوہ صفائی کے نئے  نظم و نسق اور نئے معیار کیلئے پنجاب میں کوڑے دان اور کنٹینر کیلئے باقاعدہ ویسٹ انکلوژر بنائے جائیں گے۔

اجلاس کے دوران بریفنگ میں بتایا گیا کہ شفافیت کیلئے ستھرا پنجاب میں تنخواہوں اور ادائیگی کا سسٹم ڈیجیٹلائز کر دیا گیا، گاڑیوں کی چیکنگ کیلئے وہیکل ٹریکنگ مینجمنٹ سسٹم اور لائیو کنٹینر مانیٹرنگ جاری ہے، ویسٹ کمپنیوں کیلئے کے پی آئیز کے مطابق مارکس دیکر کارکردگی کا تعین کیا جارہا ہے۔

وزیراعلیٰ مریم نواز نے اجلاس میں گفتگو کرتے ہوئے کہا کہ صفائی کا اتنا بڑا نظام کسی معجزے سے کم نہیں، شہروں اور دیہات کی صفائی کا جامع نظام برسوں پہلے بننا چاہیے تھا۔

مریم نواز نے کہا کہ زیرو سے آغاز کیا، وقت کے ساتھ ساتھ ستھرا پنجاب پراجیکٹ میں بہتری لارہے ہیں، صوبے بھر میں ستھرا پنجاب پر عوام کی طرف سے اچھے کام کا مثبت فیڈ بیک آرہا ہے۔

Follow Lahore News on X

Install our App