(لاہور نیوز) لاہور سمیت پنجاب بھر میں ڈینگی مچھروں کی افزائش میں اضافہ جاری ہے۔

محکمہ صحت پنجاب کی رپورٹ کے مطابق گزشتہ چوبیس گھنٹوں میں پنجاب بھر میں 49 کنفرم ڈینگی مریض رپورٹ ہوئے ہیں، لاہور میں گزشتہ 24 گھنٹوں میں 11 نئے ڈینگی کے مریض رپورٹ ہوئے ہیں جس کے بعد شہر میں ڈینگی کے کل کنفرم مریضوں کی تعداد 719 تک پہنچ گئی ہے۔

پنجاب میں ڈینگی کے کنفرم مریضوں کی مجموعی تعداد 3968 تک پہنچ چکی ہے اور اس کے ساتھ ساتھ شہر میں ڈینگی کے مشتبہ مریضوں کی تعداد میں بھی تیزی سے اضافہ ہو رہا ہے۔

صوبائی وزیر صحت خواجہ عمران نذیر  نے اس بات کا عندیہ دیا کہ رواں سال شہر میں ڈینگی کے مریضوں کی تعداد میں مزید خطرناک حد تک اضافہ ہو سکتا ہے جس سے صورتحال مزید پیچیدہ ہو سکتی ہے۔

انہوں  نے بتایا کہ ڈینگی کے بیشتر مریض نجی ہسپتالوں اور کلینکس پر رپورٹ ہو رہے ہیں جو کہ اس بات کا ثبوت ہے کہ اس بیماری کے حوالے سے عوام میں آگاہی اور احتیاطی تدابیر کی کمی ہے۔

صوبائی وزیر صحت خواجہ عمران نذیر  نے شہریوں سے اپیل کی کہ وہ ڈینگی کے پھیلاؤ کو روکنے کے لئے تمام ضروری اقدامات کریں اور ڈینگی ایس او پیز پر عملدرآمد کو یقینی بنائیں، گھروں میں سپرے لازمی کریں اور لوشن کا استعمال کریں تاکہ ڈینگی مچھر سے بچا جا سکے۔

خواجہ عمران نذیر  نے کہا رواں سال ڈینگی سے بچنے کیلئے ضروری ہے کہ ڈینگی مچھر کی افزائش کو بروقت روکا جائے اور اس کیلئے تمام متعلقہ اداروں کی جانب سے تیز سرویلنس اور لاروا تلف کرنے کا عمل جاری ہے۔

صوبائی وزیر  نے مزید کہا کہ ڈینگی سرویلنس کو تیز کیا جا رہا ہے اور لاروا کو ہنگامی بنیادوں پر تلف کیا جا رہا ہے تاکہ مچھر کی افزائش کو روکا جا سکے، شہریوں سے بھی کہا گیا کہ وہ اپنے اردگرد پانی کی کھڑی جگہوں کو صاف رکھیں اور کسی بھی کھڑے پانی کو نکالیں تاکہ ڈینگی مچھروں کی افزائش کا عمل روکا جا سکے۔

Follow Lahore News on X

Install our App