(لاہور نیوز) وزیراعلیٰ پنجاب مریم نواز شریف نے کہا ہے کہ پنجاب حکومت بچوں کے خلاف جرائم کا جڑ سے خاتمہ کرے گی۔

وزیراعلیٰ پنجاب مریم نواز شریف نے بچوں کے جنسی استحصال، بدسلوکی اور تشدد کی روک تھام و بحالی کے عالمی دن پر اپنے پیغام میں کہا کہ بچوں کے ساتھ ہونے والی زیادتیاں نہ صرف ایک جرم ہیں، بلکہ یہ انسانیت کے خلاف بغاوت بھی ہیں، بچے میری ریڈ لائن ہیں، سب مجھے پیارے ہیں اور ان کی حفاظت ہمارا فرض ہے۔

انہوں  نے کہا کہ بچوں کے خلاف جرائم میں ملوث افراد سماج کے ناسور ہیں اور پنجاب سے انہیں جڑ سے اکھاڑ پھینکا جائے گا، حکومت کسی بھی صورت میں بچوں کو نقصان پہنچانے والے افراد کو معاف نہیں کرے گی۔

وزیراعلیٰ پنجاب نے بتایا کہ بچوں کو تحفظ فراہم کرنے کیلئے پنجاب میں پاکستان کا پہلا ورچوئل سینٹر برائے چائلڈ سیفٹی قائم کیا گیا ہے، یہ سینٹر بچوں کے تحفظ کیلئے ایک محفوظ اور مؤثر نظام فراہم کرتا ہے، جس میں ڈیجیٹل ٹیکنالوجی اور مستحکم گورننس کو یکجا کیا گیا ہے۔

انہوں  نے کہا کہ یہ ورچوئل سینٹر اب تک ہزاروں بچھڑے ہوئے بچوں اور بزرگوں کو ان کی فیملیز سے ملا چکا ہے اور اس کا مقصد بچوں کی حفاظت اور ان کے حقوق کے تحفظ کو یقینی بنانا ہے۔

مریم نواز شریف نے اس بات پر زور دیا کہ پنجاب میں کسی بچے کے لاپتہ ہونے کی صورت میں ورچوئل سینٹر برائے چائلڈ سیفٹی سے فوری رابطہ کیا جائے، تاکہ بچے کی جلد بازیابی کو یقینی بنایا جا سکے، حکومت اس بات کو یقینی بنائے گی کہ ہر بچے کو محفوظ ماحول میں پرورش ملے اور انہیں ہر قسم کی زیادتی سے بچایا جائے۔

وزیراعلیٰ پنجاب نے اپنے پیغام میں کہا کہ پنجاب حکومت بچوں کے حقوق کے تحفظ کیلئے اپنی تمام تر توانائیاں صرف کرے گی اور کسی بھی بچے کے ساتھ زیادتی یا تشدد کو برداشت نہیں کیا جائے گا، یہ ایک ایسا وقت ہے جب ہمیں اپنے بچوں کے تحفظ کیلئے ہر ممکن قدم اٹھانا ہو گا، تاکہ ہم ایک محفوظ اور صحت مند معاشرتی نظام قائم کر سکیں۔

Follow Lahore News on X

Install our App