(ویب ڈیسک) پنجاب حکومت کی "ستھرا پنجاب" مہم کے تحت لاہور میں تجاوزات کے خاتمے کے لیے وسیع کارروائیاں جاری ہیں، ایک ہی روزمیں615 تجاوزات اور1633غیرقانونی بینرز ہٹا دیئے گئے۔
وزیراعلیٰ مریم نواز کے ویژن کے مطابق لاہور کو تجاوزات سے پاک اور صاف ستھرا شہر بنانے کا عزم کیا گیا ہے، تجاوزات ہٹانے کے ساتھ ساتھ ٹریفک کی روانی اور شہریوں کی شکایات کے ازالے پر بھی خصوصی توجہ دی جا رہی ہے۔
ڈی سی لاہورسید موسیٰ رضا کی ہدایت پر شہربھر میں گرینڈاینٹی انکروچمنٹ آپریشنز کیے جا رہے ہیں،میٹروپولیٹن آفیسر ریگولیشن کاشف جلیل کی سربراہی میں ٹیمیں مارکیٹوں و سڑکوں پر متحرک ہیں،اسسٹنٹ کمشنرز کی زیر نگرانی تجاوزات کے خاتمے کیلئے روزانہ کی بنیاد پر آپریشنز جاری ہیں۔
ڈی سی لاہور کا کہنا تھا کہ ٹریفک میں رکاوٹ بننے والی تجاوزات کو فوری طور پر ہٹایا جائے۔
ڈی سی نے ہدایت کی کہ شہر کی اہم شاہراہوں کی روزانہ کی بنیاد پر سخت مانیٹرنگ کی جائے،شہریوں کی شکایات کے ازالے کو اولین ترجیح پر یقینی بنایا جائے۔
ڈپٹی کمشنر کا کہنا تھا کہ لاہور کو تجاوزات سے پاک، صاف ستھرا شہر بنانا ہمارا عزم ہے،قانون کی حکمرانی کو ہر صورت یقینی بنایا جائے گا، کوئی قانون سے بالاتر نہیں۔
