(لاہور نیوز) پی ڈی ایم اے پنجاب نے صوبے بھر میں ڈینگی وائرس کے بڑھتے ہوئے خطرات کے پیش نظر ہائی الرٹ جاری کر دیا ہے۔

وزیراعلیٰ پنجاب مریم نواز شریف کی خصوصی ہدایات پر تمام کمشنرز اور ڈپٹی کمشنرز کو فوری طور پر انسدادی اقدامات مکمل کرنے کی ہدایت جاری کی گئی ہے۔

ڈائریکٹر جنرل پی ڈی ایم اے عرفان علی کاٹھیا نے کہا ہے کہ عوام ڈینگی سے بچاؤ کیلئے حفاظتی تدابیر اختیار کریں، خصوصاً گھروں اور اردگرد کے علاقوں میں پانی جمع نہ ہونے دیں اور صفائی کا خاص خیال رکھیں۔

انہوں  نے واضح کیا کہ بخار یا ڈینگی کی علامات ظاہر ہونے کی صورت میں فوری طور پر قریبی ہسپتال یا ڈاکٹر سے رجوع کیا جائے۔

ڈی جی پی ڈی ایم اے نے متعلقہ اداروں کو تاکید کی ہے کہ ڈینگی کے خلاف جنگ میں تمام ہیلتھ ایجنسیاں، کنٹرول سینٹرز اور ضلعی انتظامیہ مکمل طور پر الرٹ رہیں، موسمیاتی اور حشراتی ڈیٹا کا باقاعدگی سے تجزیہ کرتے ہوئے متاثرہ علاقوں میں فوری ایکشن لیا جائے۔

عرفان علی کاٹھیا کے مطابق مچھروں کی افزائش روکنے کیلئے سپرے، لاروی سائیڈ کا استعمال اور پانی کی نکاسی کو یقینی بنایا جائے، سیلاب سے متاثرہ علاقوں میں ریلیف اور شیلٹر کی فراہمی کے عمل کو بھی تیز اور مؤثر بنایا جائے۔

ڈینگی سے بچاؤ کے حوالے سے عوامی آگاہی مہم کیلئے ٹی وی، ریڈیو اور سوشل میڈیا جیسے پلیٹ فارمز کا استعمال بڑھایا جا رہا ہے تاکہ شہری خود بھی احتیاطی تدابیر اختیار کریں اور دوسروں کو بھی آگاہ کریں۔

پی ڈی ایم اے نے شہریوں سے اپیل کی ہے کہ وہ حکومت اور متعلقہ اداروں سے تعاون کریں تاکہ ڈینگی جیسے مہلک وائرس پر قابو پایا جا سکے اور قیمتی جانوں کو محفوظ بنایا جا سکے۔

Follow Lahore News on X

Install our App