(لاہور نیوز) امیر جماعت اسلامی حافظ نعیم الرحمان نے قطر میں حماس رہنماؤں پر حملے کی شدید مذمت کی ہے۔
صوبائی دارالحکومت لاہور میں منصورہ مرکز سے جاری اپنے ایک بیان میں حافظ نعیم الرحمان نے کہا ہے کہ مذاکراتی ٹیم پر اسرائیلی حملہ شرمناک دہشتگردی ہے۔
اُنہوں نے کہا کہ غزہ، ایران کے بعد قطر میں اسرائیل نے حملہ کر کے بین الاقوامی قوانین کی دھجیاں اڑا دی ہیں، کل ملک بھر میں اسرائیلی بربریت کے خلاف یوم احتجاج کا اعلان کرتے ہیں۔
امیر جماعت اسلامی کا کہنا تھا کہ حماس کے قائدین پر حملے کے خلاف اور اسرائیل کے وحشیانہ طرز عمل پر ملک بھر میں احتجاج کا دائرہ کار بڑھایا جائے گا، اسرائیل کا طرز عمل بین الاقوامی قوانین کی کھلی خلاف ورزی ہے۔
حافظ نعیم الرحمان نے مزید کہا کہ اسرائیلی حملہ امریکہ کی حمایت کے بغیر ممکن نہیں،مسلمان ممالک کی بے حسی اور خاموشی مجرمانہ طرز عمل ہے، مسلمان ملکوں پر پے در پے اسرائیلی حملے مسلم ممالک کی خاموشی کا ہی نتیجہ ہے۔
