(لاہور نیوز) پنجاب بھر میں آج سے مون سون کی شدید طوفانی بارشوں کا نیا سپیل شروع ہو رہا ہے جو 9 ستمبر تک جاری رہے گا۔

پنجاب ڈیزاسٹر مینجمنٹ اتھارٹی نے صوبے کے بیشتر اضلاع میں موسلا دھار بارشوں اور ممکنہ سیلابی صورتحال کے پیش نظر الرٹ جاری کر دیا ہے۔

بارشوں سے متاثر ہونے والے ممکنہ اضلاع:

پی ڈی ایم اے کے ترجمان کے مطابق راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات اور سیالکوٹ میں شدید بارشوں کا امکان ہے، اس کے علاوہ نارووال، حافظ آباد، منڈی بہاؤالدین، اوکاڑہ، ساہیوال، قصور، جھنگ، سرگودھا اور میانوالی میں بھی بارشیں متوقع ہیں، جبکہ جنوبی پنجاب کے اضلاع ڈیرہ غازی خان، ملتان اور راجن پور میں بھی بارشوں کا سلسلہ جاری رہنے کا امکان ہے۔

فلیش فلڈنگ کا خدشہ:

ترجمان پی ڈی ایم اے نے خبردار کیا ہے کہ 6 سے 9 ستمبر کے دوران ڈیرہ غازی خان اور قریبی علاقوں میں رودکوہیوں میں فلیش فلڈنگ کا شدید خطرہ موجود ہے۔

دریاؤں میں سیلابی کیفیت:

ڈی جی پی ڈی ایم اے عرفان علی کاٹھیا کے مطابق دریائے چناب، راوی اور ستلج میں اس وقت سیلابی صورتحال کا سامنا ہے، جس پر مسلسل نگرانی کی جا رہی ہے، بڑے شہروں میں ندی نالوں کے بپھرنے کا خدشہ بھی ظاہر کیا گیا ہے۔

تمام اداروں کو ہائی الرٹ:

پی ڈی ایم اے نے تمام کمشنرز اور ڈپٹی کمشنرز کو ہدایت دی ہے کہ وہ اپنے متعلقہ اضلاع میں الرٹ رہیں اور کسی بھی ہنگامی صورتحال سے نمٹنے کے لئے فوری اقدامات کو یقینی بنائیں، محکمہ صحت، آبپاشی، تعمیرات و مواصلات، لوکل گورنمنٹ اور لائیو اسٹاک سمیت تمام متعلقہ اداروں کو ہنگامی صورتحال سے نمٹنے کے لئے الرٹ جاری کر دیا گیا ہے۔

پی ڈی ایم اے نے شہریوں کو ہدایت کی ہے کہ وہ غیر ضروری سفر سے گریز کریں، ندی نالوں کے قریب نہ جائیں اور مقامی انتظامیہ کی ہدایات پر عمل کریں۔

Subscribe Lahore News on YouTube

Install our App