(لاہور نیوز) پنجاب میں مون سون بارشوں کا دوسرا سلسلہ 5 جولائی سے شروع ہو گا جس کے پیش نظر پی ڈی ایم اے نے صوبے بھر کی انتظامیہ کو الرٹ جاری کر دیا ہے۔

پی ڈی ایم اے کے مطابق 5 سے 10 جولائی کے دوران پنجاب کے مختلف علاقوں میں شدید بارشوں کی پیشگوئی کی گئی ہے، ادارے کے ترجمان  نے بتایا ہے کہ راولپنڈی، مری، گلیات، اٹک، چکوال، جہلم، منڈی بہاؤالدین، گوجرانوالہ، حافظ آباد اور وزیر آباد میں بارشیں متوقع ہیں۔

اس کے علاوہ لاہور، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، ننکانہ، چنیوٹ اور فیصل آباد میں بھی بارشوں کی پیشگوئی کی گئی ہے، جبکہ اوکاڑہ، قصور، خوشاب، سرگودھا، بھکر اور میانوالی میں گرج چمک کے ساتھ شدید بارشیں ہونے کا امکان ہے۔

پی ڈی ایم اے کے مطابق 6 سے 8 جولائی کے دوران بہاولپور، بہاولنگر، ڈیرہ غازی خان، ملتان، مظفرگڑھ، خانیوال، لودھراں، راجن پور، رحیم یار خان اور لیہ میں بھی گرج چمک کے ساتھ بارشیں متوقع ہیں۔

ڈی جی پی ڈی ایم اے عرفان علی کاٹھیا کے مطابق 7 جولائی سے صوبے کے بڑے دریاؤں میں پانی کے بہاؤ میں نمایاں اضافہ متوقع ہے، جس سے دریاؤں سے ملحقہ ندی نالوں، ہل ٹورنٹس اور برساتی نالوں میں سیلابی صورتحال پیدا ہو سکتی ہے۔ شمالی اور وسطی پنجاب کے شہری علاقوں میں اربن فلڈنگ کا خدشہ بھی ظاہر کیا گیا ہے۔

وزیراعلیٰ پنجاب مریم نواز کی ہدایات پر عمل کرتے ہوئے واسا، ریسکیو 1122، محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک سمیت تمام متعلقہ اداروں کو پیشگی الرٹ جاری کر دیا گیا ہے۔

ڈی جی پی ڈی ایم اے نے شہریوں سے اپیل کی ہے کہ خراب موسم کے دوران احتیاطی تدابیر اختیار کریں اور کسی بھی ہنگامی صورتحال میں فوری طور پر ریسکیو اداروں سے رابطہ کریں۔

Subscribe Lahore News on YouTube

Install our App