27 Jun 2025
(لاہور نیوز) محکمہ سکول ایجوکیشن کی جانب سے اساتذہ کیلئے سکوٹیز فراہم کرنے کا وعدہ محض اعلان کی حد تک محدود رہا۔
وزیر تعلیم کی جانب سے اعلان کیا گیا تھا کہ آئندہ مالی سال کے دوران سکولوں اور کالجز کے اساتذہ کو سکوٹیز فراہم کی جائیں گی، تاکہ بالخصوص خواتین اساتذہ کو آمدورفت میں سہولت فراہم کی جا سکے۔
سرکاری بجٹ دستاویزات کے مطابق اس سکیم کیلئے کوئی مالی وسائل نہیں رکھے گئے، جس پر اساتذہ برادری میں شدید مایوسی پھیل گئی ہے۔
اساتذہ کا کہنا ہے کہ یہ فیصلہ بالخصوص خواتین اساتذہ کو براہ راست متاثر کرے گا، جو پہلے ہی سفری مشکلات کا سامنا کر رہی ہیں، کئی اساتذہ نے مطالبہ کیا ہے کہ محکمہ سکول ایجوکیشن اور ہائر ایجوکیشن اس فیصلے پر فوری نظر ثانی کرے اور وزیر تعلیم کو اپنے وعدے پر عملدرآمد کا پابند بنایا جائے۔
