25 Jun 2025
(لاہور نیوز) پنجاب کے سرکاری کالجز میں مستقل پرنسپلز کی تقرری کا معاملہ ایک بار پھر تاخیر کا شکار ہو گیا۔
محکمہ ہائر ایجوکیشن پنجاب کی جانب سے درخواستیں طلب کرنے کے بعد انٹرویوز کا عمل بغیر کسی اعلان کے روک دیا گیا، جس سے سینکڑوں امیدوار شدید مایوسی کا شکار ہیں۔
ذرائع کے مطابق صوبے بھر کے تقریباً 150 سے 200 سرکاری کالجز میں ریگولر پرنسپل تعینات کئے جانے ہیں، تاہم چار ماہ گزرنے کے باوجود نہ تو انٹرویوز کا شیڈول جاری کیا گیا اور نہ ہی درخواست گزاروں کے اعتراضات کا ازالہ کیا گیا۔
متاثرہ امیدواروں کا کہنا ہے کہ وہ کئی مہینوں سے تیاری کر رہے ہیں، مگر محکمہ ہائر ایجوکیشن کی خاموشی نے انہیں شدید ذہنی دباؤ میں مبتلا کر دیا ہے، امیدواروں نے مطالبہ کیا ہے کہ انٹرویوز کا عمل فوری طور پر شروع کیا جائے اور شفاف طریقے سے تقرریاں کی جائیں۔
