
(لاہور نیوز) محکمہ اوقاف و مذہبی امور پنجاب کے زیر انتظام حضرت شاہ حسین المعروف حضرت مادھو لال حسینؒ کے437 ویں تین روزہ سالانہ عرس کی تقریبات شروع ہو گئیں۔
تین روزہ سالانہ عرس کی تقریبات کا آغاز سیکرٹری اوقاف پنجاب ڈاکٹر سید طاہر رضا بخاری نے پیر سید ناظم حسین شاہ کی ہمراہی میں رسم چادر پوشی سے کیا، حکومت پنجاب کی جانب سے جاری احکامات کی روشنی میں سالانہ عرس کی مناسبت سے لاہور میں آج مقامی تعطیل ہے۔
عرس تقریبات 14 اپریل (سوموار) تک جاری رہیں گی، عرس کا تیسرا اور آخری دن (سوموار) خواتین زائرین کے لئے مختص ہو گا، عرس کے تینوں دن راؤنڈ دی کلاک لنگر کی فراہمی یقینی بنانے اور دیگر انتظامات کے لئے محکمہ اوقاف پنجاب نے 4 لاکھ 59 ہزار روپے عرس گرانٹ کی مد میں مختص کئے ہیں۔
سالانہ عرس کے سلسلے میں افتتاحی تقریب”دو روزہ حضرت شاہ حسین ؒ صوفی کانفرنس“ آج بھی مزار پر انوار سے ملحقہ جامع مسجد میں جاری رہے گی۔
رسم چادر پوشی کی تقریب میں ڈائریکٹر جنرل مذہبی امور خالد محمود سندھو، ڈائریکٹر ایڈمنسٹریشن محمد شاکر سندھو، ڈپٹی ڈائریکٹر اسٹیٹ آصف اعجاز بھی موجود تھے۔
رسم چادر پوشی کی تقریب میں ڈائریکٹر پراجیکٹ رفیق نور وٹو، ایڈمنسٹریٹر لاہور(ویسٹ) زون ایاز احمد لاشاری، زونل خطیب مفتی محمد کریم خان بھی موجود تھے، ترجمان اوقاف محمد علی خان، امور مذہبیہ کمیٹی کے ممبران اور علماء و مشائخ عظام کے ساتھ ساتھ زائرین بھی موجود تھے۔
رسم چادر پوشی کی تقریب میں خطیب جامع مسجد داتا دربار مفتی محمد رمضان سیالوی نے بھی خصوصی طور پر شرکت کی۔