سلمان اکرم راجہ، شبلی فراز کے ہمراہ پریس کانفرنس کرتے ہوئے عمر ایوب کا کہنا تھا کہ شہباز شریف نے کہا کہ ملک میں استحکام آیا ہے، کہتے ہیں معیشت میں استحکام آیا ہے وہ کہاں ہے ہمیں نظر نہیں آتا؟

انہوں نے کہا کہ ملک اس وقت بد حالی کا شکار ہو چکا ہے، گندم کی کاشت اور پیداوار میں بحران کا سامنا ہے، معیشت کا پہیہ مکمل جام ہے، انڈسٹری بالکل بند ہے، زراعت اس وقت مشکل ترین وقت سے گزر رہی ہے۔

اپوزیشن لیڈر کا کہنا تھا کہ اس وقت آئی ٹی اور ٹیلی کام سیکٹر بہت پیچھے رہ گیا ہے، سروس نہیں مل رہی، معیشت سکڑ چکی اور بد ترین حالات سے گزر رہی ہے، روپے کی قیمت میں کمی آنے سے 120 ارب روپے کا قرض اضافی چڑھا، دوہزار نو سو تیس ارب روپے کے قرضے ری شیڈول کیے گئے۔

عمر ایوب کا مزید کہنا تھا کہ جب یہ قرض ادا کرنا ہو گا تو اس کی قیمت پاکستانیوں کو ادا کرنا ہو گی، چودہ سو ارب روپے کے ترقیاتی بجٹ میں سے صرف 92 ارب روپے خرچ ہوئے، تین ماہ باقی ہیں ابھی تک صرف 8 فیصد ترقیاتی بجٹ خرچ ہوا۔

سلمان اکرم راجہ

سیکرٹری جنرل پاکستان تحریک انصاف سلمان اکرم راجہ  نے کہا ہے کہ اس وقت ملک میں معیشت کا برا حال ہے، بانی پی ٹی آئی پر 200 کے قریب مقدمات بنائے گئے، 26 نومبر کو جو کچھ ہوا سب کے سامنے ہے، تمام اپوزیشن جماعتوں کو اکٹھا کر رہے ہیں، ہم چاہتے ہیں عمران خان کو کسی ڈیل نہیں آئین و قانون کے ذریعے باہر نکالیں، ہمارا ہر لمحہ بانی کی رہائی کی کوشش میں ہے۔

شبلی فراز

سینیٹر شبلی فراز کا کہنا تھا کہ پیپلز پارٹی اور (ن) لیگ  نے پاکستان کی معیشت کو گروی رکھا، جن اداروں میں نقصانات کم ہیں ان کو بیچ رہے ہیں، جہاں ان کے مفادات کو نقصان ہو وہ اس پر قانون سازی کر لیتے ہیں، پاور سیکٹر کو ہی لے لیں تباہی کے دہانے پر پہنچا دیا ہے، دوسری جانب سینیٹ میں خیبرپختونخوا ہی کی نمائندگی ہی نہیں۔