(ویب ڈیسک) پاکستان شوبز کی سینئر اداکارہ اور ٹی وی میزبان عفت عمر نے اپنے جوانی کے تعلقات سے متعلق انکشاف کرتے ہوئے کہا ہے کہ انہوں نے کبھی اپنے افیئرز اور سکینڈلز کو تسلیم کرنے سے انکار نہیں کیا۔

حال ہی میں ایک پوڈکاسٹ میں اداکارہ عفت عمر نے انکشاف کیا کہ ہر لڑکی کی طرح جوانی میں ان کے بھی افیئرز رہ چکے ہیں تاہم انہوں نے کبھی افیئرز اور اسکینڈلز کو تسلیم کرنے سے انکار نہیں کیا۔

ایک سوال کے جواب میں عفت عمر نے انکشاف کیا کہ ان کے بارے میں افواہیں پھیلائی جاتی ہیں کہ وہ طلاق یافتہ ہیں۔

عفت عمر نے بتایا کہ بعض لوگ خواتین کو تنقید کا نشانہ بناتے ہوئے یہ دعویٰ کرتے ہیں کہ 35 طلاق یافتہ فیمنسٹ خواتین تحریک کی پشت پر ہیں اور ان 35 خواتین میں انہیں بھی شامل کیا جاتا ہے۔

اسی موضوع پر مزید بات کرتے ہوئے عفت عمر نے کہا کہ ان کا کوئی سکینڈل یا افیئر کبھی منظر عام پر نہیں آیا کیونکہ ان کی طبیعت ایسی نہیں تھی۔ انہوں نے وضاحت کی کہ چونکہ ان کے افیئرز کسی معروف شخصیت کے ساتھ نہیں تھے، اس لیے ان کے بارے میں کوئی سکینڈل نہیں بن سکا۔

شوبز کیریئر شروع ہونے کے حوالے سے سوال کے جواب میں اداکارہ نے بتایا کہ میٹرک کے دوران وہ ایک پروگرام میں شریک تھیں جب ایک خاتون صحافی نے ان کی تصاویر لیں، جو بعد میں ایک معروف روزنامہ کے رنگین صفحے پر شائع ہوئیں۔ اس کے بعد انہیں اخبار کی جانب سے ماڈلنگ کی پیش کش کی گئی، جسے انہوں نے قبول کر لیا۔

انہوں نے یہ بھی بتایا کہ ماڈلنگ کی پیش کش کے وقت ان کی والدہ تھائی لینڈ میں موجود تھیں اورانہوں نے ان کی اجازت کے بغیر ہی پیشکش کو منظور کر لیا۔ وہ اپنی سہیلیوں کے ساتھ جا کر اپنا پہلا فوٹو شوٹ کروانے گئیں۔

عفت عمر کے مطابق، انہوں نے محض 16 سال کی عمر میں ماڈلنگ کا آغاز کیا۔ اس کے بعد انہیں مختلف اداروں اور ایجنسیوں سے مسلسل مواقع ملتے رہے اور یوں ماڈلنگ کے ساتھ ان کا اداکاری کا سفر بھی شروع ہو گیا۔

Follow Lahore News on Twitter

Install our App