(لاہور نیوز) چیف جسٹس لاہور ہائیکورٹ عالیہ نیلم کا ایک اور انقلابی اقدام سامنے آ گیا، چیف جسٹس عالیہ نیلم نے لاہور ہائیکورٹ میں جدید سہولیات سے آراستہ منی ہسپتال کا افتتاح کر دیا۔

افتتاح کے موقع پر جسٹس سید شہباز علی رضوی اور جسٹس انوارالحق پنوں بھی موجود تھے، جسٹس مزمل اختر شبیر، جسٹس انوار حسین بھی افتتاحی تقریب میں موجود تھے، رجسٹرار لاہور ہائیکورٹ عبہر گل خان بھی افتتاح کے موقع پر موجود تھے، ایم ایس سروسز ہسپتال ڈاکٹر عبدالمدبر نے بھی افتتاحی تقریب میں شرکت کی۔

لاہور ہائیکورٹ ڈسپنسری کو جدید خطوط پر استوار اور اپ گریڈ کرتے ہوئے منی ہسپتال بنایا گیا، منی ہسپتال میں لاہور ہائیکورٹ افسران و سٹاف ممبران کے علاوہ سائلین کو بھی ضروری طبی امداد کی سہولت دی جائے گی، منی ہسپتال میں مزید بیڈز بھی فراہم کئے گئے ہیں۔

لاہور ہائیکورٹ میں موجود منی ہسپتال میں ایکس رے روم، ای سی جی اور بنیادی ضروری ٹیسٹوں کے لئے سیمپل کولیکشن کی سہولیات فراہم کی گئی ہیں، منی ہسپتال کے لئے تمام ضروری آلات و میڈیکل مشینری، سٹریچر اور ویل چیئر بھی فراہم کی گئی ہے۔

منی ہسپتال میں ڈاکٹرز، سٹاف نرس، وارڈ اٹینڈنٹ، ٹیکنیشن، آؤٹ پیشنٹ ڈور کنسلٹنٹ بھی موجود ہونگے، وائٹل چیک اپ، او پی ڈی مریضوں کے لئے ادویات اور ضرورت پڑنے پر مریض کو بڑے سرکاری ہسپتالوں میں ریفر کرنے کی سہولت سمیت مریضوں کے ریکارڈ کا جدید نظام بھی فراہم کیا گیا ہے۔

 چیف جسٹس عالیہ نیلم نے افتتاح کے موقع پر اظہارِ خیال کرتے ہوئے کہا صحت مند اور تندرست سٹاف نظامِ انصاف میں ریڑھ کی ہڈی کی حیثیت رکھتا ہے، سٹاف کو فراہم کردہ صحت کی سہولیات پر کسی بھی قسم کا کوئی سمجھوتہ نہیں کیا جائے گا۔

 چیف جسٹس عالیہ نیلم نے منی ہسپتال میں ہمہ وقت ایمرجنسی سہولیات، ادویات کی فراہمی اور بنیادی میڈیکل ٹیسٹوں کی سہولیات کو یقینی بنانے کی ہدایت بھی کر دی۔

Follow Lahore News on Twitter

Install our App