لاہور: (محمد بلال) سال 2023 جلد ہی ماضی کا قصہ بننے جارہا ہے، اس سے قبل کہ سال 2023 قصہ پارینہ بن جائے، ہم اُن شوبز شخصیات سے آپ کو آگاہ کرتے چلیں جنہوں نے ہم سفر کا انتخاب کر کے نئی زندگی کا آغاز کیا۔

اشنا شاہ:

معروف پاکستانی اداکارہ اشنا شاہ نے سال 2023 میں 26 فروری کے روز اپنے دوست حمزہ امین کے ساتھ زندگی کے نئے سفر کا آغاز کیا تھا۔

حمزہ امین ایتھلیٹ ہیں اور گالف کے کھیل سے وابستہ ہیں، جوڑے کی شادی کی تقریبات ایک ہفتہ جاری رہیں جن میں شوبز کے چمکتے ستاروں نے شرکت کر کے اداکارہ کی خوشیوں میں اضافہ کیا تھا۔

کومل رضوی:

معروف گلوکارہ کومل رضوی نے بھی  اس برس دوسری شادی کر کے زندگی کو آگے بڑھایا۔

کومل رضوی 21 اپریل کو امریکا میں مقیم ایس علی اُپل نامی بزنس مین سے شادی کے بندھن میں بندھی تھیں، گلوکارہ نے شادی کی تقریب کی تصاویر انسٹاگرام پر پوسٹ کر کے مداحوں کو حیران کر دیا تھا۔

مدیحہ امام:

خوبرو پاکستانی اداکارہ مدیحہ امام نے 3 مئی کو شادی کی تصاویر سوشل میڈیا پر جاری کر کے مداحوں کو سرپرائز دیا تھا۔

اداکارہ نے متحدہ عرب امارات میں بھارتی فلم ساز موجی بصر سے شادی کی تھی جبکہ اس کے تقریباً 6 ماہ بعد جوڑے کے ولیمے کی تقریب بھارتی ریاست ارونا چل پردیش میں منعقد کی گئی تھی۔

مدیحہ کی شادی پرجہاں ان کے مداحوں نےخوشی کا اظہار کیا وہیں کچھ مداح بھارت میں شادی کرنے پر ان سے مایوس بھی ہوئے ۔

ماہرہ خان:

پاکستانی سپر سٹار ماہرہ خان نے بھی شادی کر کے مداحوں کو سرپرائز دیا تھا۔

 2 اکتوبر کے دن اچانک سے میڈیا اور سوشل میڈیا پر ماہرہ خان کی دوسری شادی کی تصاویر اور ویڈیوز گردش کرنے لگی تھیں۔

ماہرہ  نے سیاحتی مقام مری میں اپنے دوست اور کاروباری شخصیت سلیم کریم سے نکاح کیا تھا۔

خیال رہے کہ ماہرہ خان کی اس سے قبل 2007 میں علی عسکری سے پہلی شادی ہوئی تھی تاہم جوڑے کے درمیان 2015 میں علیحدگی ہوگئی تھی۔

حرا خان:

نجی ٹی وی کے ڈرامہ سیریل "میرے ہم سفر" میں "رومی" نامی لڑکی کا کردار نبھانے والی اداکارہ حرا خان بھی رواں برس 11 فروری کے دن ارسلان خان سے شادی کے بندھن میں  بندھی تھیں۔

 شادی کی تقریبات میں جوڑے نے خوب ہلا گلا کیا تھا، ارسلان خان ایک ماڈل ہیں جنہیں حرا خان نے خود پروپوز کیا تھا۔

انزیلا عباسی:

ابھرتی ہوئی اداکارہ و ماڈل انزیلا عباسی، شوبز کے تجربہ کار جویریہ اور شمعون عباسی کی بیٹی ہیں جن کی شادی کی تقریب 5 اگست 2023 کو انجام پائی تھی، جس میں کئی شوبز شخصیات نے شرکت کی تھی،انزیلا عباسی نےمصنف تاشفین انصاری سےشادی کر کے زندگی کے نئے سفر کا آغاز کیا۔

Follow Lahore News on Twitter

Install our App