![](/lahorenewsimages/78568_83517810.jpg.pagespeed.ce.dcv0_iAYFH.jpg)
(ویب ڈیسک) قومی کرکٹ ٹیم کے سابق کپتان راشد لطیف اور سپورٹس تجزیہ کار نعمان نیاز نے نوجوان کرکٹر اعظم خان کی پاکستان ٹی20 کپ میں بلے پر فلسطین کا سٹیکر لگاکر کھیلنے پر انکی جرات کی داد دے دی۔
سماجی رابطے کی سائٹ ایکس پر سابق کپتان راشد لطیف اور سپورٹس تجزیہ کار نعمان نیاز نے گفتگو کرتے ہوئے کہا کہ میں اعظم خان کی جرات کی تعریف کروں گا، جس نے یہ اقدام اٹھایا۔
انہوں نے کہا کہ لیگز کھیلنے والا کرکٹر جب انٹرنیشنل کھیلنے کیلئے پاکستان کرکٹ بورڈ پر انحصار کرتا ہو، اس کی طرف سے اسی دلیری کا مظاہرہ کرنا بڑی بات ہے۔
نعمان نیاز نے بتایا کہ اعظم خان کو ریفری کی جانب سے خبردار کیا گیا تھا کہ بلے کو تبدیل کرلیں لیکن انہوں نے جرمانہ قبول کیا، اس موقع پر راشد لطیف نے کہا کہ انٹرنیشنل کرکٹ کے دوران انہیں خیال کرنا پڑے گا۔
سابق کپتان نے انکشاف کیا کہ ورلڈکپ کے دوران پلیئرز نے جب فلسطین کی حمایت میں ٹوئٹ کیا تھا تو بورڈ نے کھلاڑیوں پر دباؤ ڈالا تھا کہ ٹوئٹ ڈیلیٹ کریں۔
خیال رہے کہ نیشنل ٹی20 کپ کے میچ میں اپنے بلے پر فلسطینی پرچم کا سٹیکر لگانے پر کرکٹر اعظم خان پر میچ فیس کا 50 فیصد جرمانہ عائد کیا گیا تھا، جس پر پی سی بی کو کڑی تنقید کا نشانہ بھی بنایا گیا۔
بورڈ کو مداحوں نے تنقید کا نشانہ بناتے ہوئے اعظم خان پر جرمانے کی شدید مذمت کی ہے جبکہ صارفین نے ذکاء اشرف کی برطرفی کا بھی مطالبہ کیا ہے۔