(ویب ڈیسک ) سوئی ناردرن گیس پائپ لائنز لمیٹڈ (ایس این جی پی ایل) کا کارپوریٹ بریفنگ سیشن لاہور سٹاک ایکسچینج پلازہ، لاہور میں منعقد ہوا۔

منیجنگ ڈائریکٹر ایس این جی پی ایل عامر طفیل نے تجزیہ کاروں، سرمایہ کاروں اور شیئر ہولڈرز کو کمپنی کی کارکردگی اور اس کے مستقبل کے امکانات کے بارے میں آگاہ کیا۔

تقریب سے خطاب کرتے ہوئے کمپنی کی انتظامیہ نے شرکاء کو بریفنگ دی کہ کمپنی نے پہلی دفعہ ایک کھرب روپے سے زائد کی آمدنی کا سنگ میل حاصل کیا ہے، کمپنی کے منافع میں 5.66 فیصد کی کمی واقع ہوئی ہے جس کی بنیادی وجہ WACC کے تحت ROA کی شرح میں تبدیلی یعنی 17.43 فیصد سے 16.6 فیصد تک کمی اور وفاقی حکومت کی جانب سے سپر ٹیکس کا نفاذ ہے۔

ایس این جی پی ایل کا کارپوریٹ بریفنگ سیشن میں حکومت کی کوششوں کو سراہتے ہوئے کہا گیا ہے کہ اس سال کے آخر تک توقع ہے کہ سسٹم میں 100 MMCFD گیس کا حجم شامل ہو جائے گا۔

مزید برآں، کمپنی کی انتظامیہ نے اس بات پر روشنی ڈالی کہ کمپنی کے گیس کے نقصانات (UFG) مالی سال 2020-21میں 8.60 فیصد سے کم ہو کر مالی سال 2021-22 میں 8.06 فیصد رہ گئے ہیں۔

توانائی کے شعبے کی صورتحال پر روشنی ڈالتے ہوئے، کمپنی کی انتظامیہ نے بتایا کہ مقامی قدرتی گیس کے وسائل کی کمی کی وجہ سے، اب RLNG کا حصہ گیس کی سپلائی میں تقریباً 50% حصہ ہے، جو ملک میں طلب اور رسد کی صورتحال کی وجہ سے مزید بڑھ سکتا ہے۔

ایم ڈی ایس این جی پی ایل نے مزید بتایا کہ نئی دریافتوں میں کمپنی کے نیٹ ورک میں ولی کنوئیں سے گیس پہلے ہی شامل کی جا چکی ہے جبکہ شیوا کے کنوئیں سے مقامی قدرتی گیس رواں سال کے آخر تک داخل کیے جانے کا امکان ہے۔

کمپنی کے مستقبل کے نقطہ نظر کا اشتراک کرتے ہوئے، کمپنی کی انتظامیہ نے کہا کہ کمپنی اگلے 5 سالوں کے دوران  قدرتی گیس یوٹیلیٹی سے انرجی کمپنی میں تبدیل کرنے پر غور کر رہی ہے۔ اس دوران، کمپنی کا مقصد مختلف اقدامات کو لاگو کرکے اپنے مرکز کی حفاظت کرنا ہے، کاروبار میں کمال اور جدت کا حصول اور نئے کاروباری مواقع حاصل کرکے توانائی کے شعبے میں اپنی پوزیشن برقرار رکھنا ہے۔

کمپنی کی سینئر مینجمنٹ بشمول فیصل اقبال، سی ایف او سید جواد نسیم، ایس جی ایم (بی ڈی) قیصر مسعود، ایس جی ایم (ڈی) اور کمپنی سیکرٹری امتیاز محمود بھی اس موقع پر موجود تھے۔

سیشن میں تجزیہ کاروں، سرمایہ کاروں اور شیئر ہولڈرز نے آن لائن بھی بڑی تعداد میں شرکت کی جنہوں نے منیجنگ ڈائریکٹر عامر طفیل کی قیادت میں کمپنی کی ٹیم کی طرف سے دی گئی بریفنگ میں گہری دلچسپی ظاہر کی۔

بریفنگ کے بعد سوال و جواب کا سیشن ہوا جس میں تمام سوالات کے منیجنگ ڈائریکٹر اور سینئر مینجمنٹ نے انتہائی مثبت انداز میں جوابات دیئے۔

Subscribe Lahore News on YouTube

Install our App