(ویب ڈیسک) کاؤنٹر ٹیررازم ڈیپارٹمنٹ (سی ٹی ڈی) نے رواں برس مختلف آپریشنز کر کے دہشت گردی کی کارروائیوں، پلاننگ اور معاونت میں ملوث 114 نیٹ ورکس کا خاتمہ کیا، سی ٹی ڈی کی رواں برس کی کارکردگی رپورٹ جاری کر دی گئی۔

سی ٹی ڈی ترجمان کے مطابق ادارے نے لاہور سمیت مختلف اضلاع میں 901 انٹیلی جنس بیسڈ آپریشنز کر کے دہشت گردی، ملک و سماج دشمن سرگرمیوں میں ملوث 177ملزمان کو گرفتار کیا، ملزمان کے خلاف 142 ایف آئی آرز درج کروائی گئیں، گرفتار ملزمان میں ریڈ بک میں شامل کالعدم تنظیموں کے 03 انتہائی مطلوب دہشت گرد بھی شامل ہیں۔

ترجمان نے بتایا ہے کہ سی ٹی ڈی نے بروقت اقدامات سے دہشت گردی کی کارروائیوں، پلاننگ اور معاونت میں ملوث 114 نیٹ ورکس کا خاتمہ کیا، دہشت گردوں کے قبضے سے بڑی تعداد میں خود کش جیکٹس، راکٹس، ہینڈ گرنیڈز، ڈیٹونیٹرز، آئی ای ڈیز، دھماکہ خیز مواد برآمد کیا گیا، ملزمان سے پسٹلز، بال بیرنگ باکس، گولیاں ، سیفٹی فیوز، پرائم کارڈز ، لیپ ٹاپس، موبائل، ،کالعدم کتابوں، میگزینز اور پمفلٹس سمیت دیگر متنازعہ مواد بھی برآمد ہوا ۔

حکام کے مطابق سی ٹی ڈی نے انٹیلی جنس بیسڈ آپریشنز کے ذریعے 133 دہشت گردانہ منصوبوں کو خاک میں ملا کر مجرموں کو گرفتار کیا، آئی جی پنجاب ڈاکٹر عثمان انور نے شاندار کارکردگی پر سی ٹی ڈی کو شاباش دی اور ایڈیشنل آئی جی سی ٹی ڈی کو انٹیلی جنس بیسڈ آپریشنز میں تیزی کی ہدایت کی۔

آئی جی پنجاب ڈاکٹر عثمان انور نے کہا ہے کہ سی ٹی ڈی دہشت گردی، شدت و شرپسندی سمیت دیگر مجرمانہ سرگرمیوں میں ملوث عناصر کے قلع قمع کیلئے مصروف عمل ہے، صوبے سے دہشت گردی کے مکمل خاتمے کیلئے مؤثر انفارمیشن شیئرنگ سے انٹیلی جنس بیسڈ آپریشنز جاری رکھے جائیں، دہشت گردوں، سہولت کاروں، فنانسرز سمیت تمام مجرمان کو قانون کی گرفت میں لا کر قرار واقعی سزائیں دلوائی جائیں۔

Subscribe Lahore News on YouTube

Install our App