(ویب ڈیسک ) عالمی ادارہ صحت (ڈبلیو ایچ او) کی جانب سے کولڈڈرنکس و دیگر مصنوعات میں عام استعمال ہونے والے سویٹنر ’ اسپارٹیم‘ کو رواں ماہ انسانوں میں کینسر کی ممکنہ وجہ قرار دیے جانے کا امکان ہے۔

غیر ملکی خبر رساں ادارے کی رپورٹ کے مطابق ڈبلیو ایچ او کے تحت کام کرنے والی انٹرنیشنل ایجنسی فار ریسرچ آن کینسر (آئی اے آر سی) کی جانب سے ممکنہ طور پر جولائی میں اس حوالے سے سفارشات  جاری کی جائیں گی، آئی اے آر سی کی جانب سے 14 جولائی کو اسپارٹیم کو کینسر کا خطرہ بڑھانے والا ممکنہ جُز قرار دیا جا سکتا ہے۔

ڈبلیو ایچ او کی غذائی اجزا کے حوالے سے قائم ماہرین کی کمیٹی کی سفارشات 14 جولائی کو جاری کی جائیں گی، اجلاس میں بتایا جائے گا کہ ایک پراڈکٹ جیسے اسپارٹیم کو ایک شخص کتنی مقدار میں استعمال کر سکتا ہے اور اس حوالے سے کن قوانین کی ضرورت ہے۔

اسپارٹیم ایسی مٹھاس ہے جس میں کم کیلوریز پائی جاتی ہیں، جو عام چینی سے 200 گنا زیادہ میٹھا ہوتا ہے، یہ کولڈ ڈرنک، ڈائیٹ ڈرانکس ،چیونگم اور بعض اوقات دہی میں بھی شامل ہوتا ہے، جن مصنوعات میں اسپارٹیم سب سے زیادہ اور عام پایا جاتا ہے ان میں سافٹ ڈرنکس شامل ہیں لیکن ابھی تک یہ سویٹنر تقریباً 600 مصنوعات میں موجود ہے۔

سویٹنر کو کئی دہائیوں سے فوڈ سیفٹی کے اداروں کی منظوری کے ساتھ استعمال کیا جا رہا ہے لیکن اب ان مصنوعات میں استعمال ہونے والے اجزا پر ایک نئی بحث شروع ہوگئی ہے۔

عالمی ادارہ صحت کےتحت کام کرنے والی انٹرنیشنل ایجنسی فار ریسرچ آن کینسر (آئی اے آر سی) اسپارٹیم اور کینسر کے بارے میں ایک ہزار 300 مطالعات کا جائزہ لے رہی ہے۔

یہ رپورٹ اس وقت سامنے آئی ہے جب مئی 2023 میں عالمی ادارہ صحت نے مصنوعی مٹھاس کو مضر صحت قرار دیا تھا ، عالمی ادارہ صحت کی جانب سے کہا گیا تھا کہ مصنوعی مٹھاس کے استعمال سے ٹائپ 2 ذیابیطس، قلبی امراض اور کم عمر میں موت کے خطرات بڑھ جاتے ہیں۔

یاد رہے کہ لاکھوں لوگ روزانہ کافی، ڈائٹ سوڈا اور کھانے کی اشیا میں مصنوعی مٹھاس کا استعمال کرتے ہیں، کیونکہ ان کا ماننا ہے کہ چینی کے استعمال سے وزن میں اضافہ ہوتا ہے اس لیے مصنوعی مٹھاس کو چینی کا بہترین متبادل مانا جاتا ہے۔

عالمی ادارہ صحت کے ڈائریکٹر برائے غذائیت اور فوڈ سیفٹی فرانسسکو برانکا نے اس بات پر زور دیتے ہوئے کہا تھا کہ عام چینی کی جگہ مصنوعی مٹھاس استعمال کرنے سے صحت پر طویل مدتی فوائد نہیں پہنچتے اور وزن بھی کم نہیں ہوتا۔

انہوں نے کہا تھا کہ لوگ اگر چینی کا استعمال کم کرنا چاہتے ہیں یا متبادل ڈھونڈ رہے ہیں تو انہیں پھل استعمال کرنے چاہئیں جن میں قدرتی مٹھاس شامل ہے۔

Follow Lahore News on Facebook

Install our App