گورنر پنجاب کا لاہور ریلوے سٹیشن کا دورہ، لاہور سے اسلام آباد تک ٹرین میں سفر
(لاہور نیوز) گورنر پنجاب سردار سلیم حیدر خان کی لاہور ریلوے سٹیشن آمد ،ریلوے حکام اور شہریوں نے ان کا پرتپاک استقبال کیا، گورنر پنجاب نے لاہور سے اسلام آباد تک ٹرین کے ذریعے سفر بھی کیا۔
ٹرین میں سفر کے دوران شہری گورنر کو دیکھ کر ہاتھ ہلاتے رہے اور خوشی کا اظہار کرتے رہے۔ ریلوے کے عملے نے بھی سٹیشن پر ان کا استقبال کیا اور نیک تمناؤں کا اظہار کیا۔
لاہور ریلوے سٹیشن اپنی تاریخی اہمیت کے باعث ملک بھر میں پہچانا جاتا ہے۔ اس موقع پر گورنر پنجاب سردار سلیم حیدر خان نے کہا کہ ٹرین کا سفر محفوظ، آرام دہ اور قابلِ اعتماد ذریعۂ سفر ہے، وقت کے ساتھ ساتھ ریلوے کے نظام کو جدید تقاضوں سے ہم آہنگ کرتے ہوئے مزید معیاری اور سہل بنایا گیا ہے۔
انہوں نے عوام پر زور دیا کہ وہ گاڑیوں اور بسوں کے مقابلے میں ٹرین کے سفر کو ترجیح دیں تاکہ ٹریفک حادثات اور ماحولیاتی آلودگی میں کمی لائی جا سکے۔ گورنر پنجاب نے کہا کہ ریلوے کا محفوظ اور منظم نظام ملکی ترقی میں اہم کردار ادا کر سکتا ہے۔
