غیرقانونی افغان باشندوں کیخلاف کریک ڈاؤن، 20 لاکھ افغان باشندوں کی وطن واپسی
(لاہور نیوز) محکمہ داخلہ پنجاب کے فارن نیشنل سکیورٹی سیل کی جانب سے غیر قانونی طور پر مقیم افغان باشندوں کے انخلاء کے سلسلے میں مؤثر کارروائیاں جاری ہیں۔
سرکاری اعداد و شمار کے مطابق 2023 سے اب تک پاکستان سے مجموعی طور پر تقریباً 20 لاکھ افغان باشندوں کو وطن واپس بھجوایا جا چکا ہے۔
حکام کے مطابق صرف پنجاب سے تقریباً 2 لاکھ غیر قانونی مقیم افغان باشندوں کو واپس بھجوایا گیا، کریک ڈاؤن کے دوران صوبہ بھر میں عوامی مقامات، رہائشی علاقوں، مدارس اور تعلیمی اداروں کی جامع جانچ کی گئی، جبکہ مختلف کاروباری سرگرمیوں کا بھی تفصیلی جائزہ لیا گیا۔
رپورٹ کے مطابق کارروائیوں کے دوران 11 ہزار 347 غیر قانونی افغان باشندوں کی نشاندہی کی گئی جنہیں قانونی تقاضے پورے کرنے کے بعد واپس بھجوایا گیا، اس وقت پنجاب میں 37 ہولڈنگ سینٹرز فعال ہیں جہاں 69 افغان شہری موجود ہیں۔
ان ہولڈنگ سینٹرز میں غیر قانونی مقیم افغان باشندوں کی عارضی رہائش، رجسٹریشن اور وطن واپسی کے انتظامات کئے گئے ہیں، حکام کا کہنا ہے کہ یہ اقدامات وفاقی پالیسی کے تحت کئے جا رہے ہیں اور صوبے میں قانون کی عملداری کو یقینی بنایا جا رہا ہے۔
