(لاہور نیوز) سنیکس کی تیاری میں ناقص اور استعمال شدہ آئل کے استعمال پر پنجاب فوڈ اتھارٹی نے بڑا ایکشن لیتے ہوئے کماہاں روڈ پر قائم ایک یونٹ بند کر دیا۔

فوڈ اتھارٹی حکام کے مطابق یہ کارروائی ڈی جی فوڈ اتھارٹی عاصم جاوید کی ہدایات پر فوڈ سیفٹی ٹیموں نے عمل میں لائی، یونٹ میں استعمال شدہ ناقص آئل میں نمکو تیار کی جا رہی تھی، کارروائی کے دوران 400 لیٹر استعمال شدہ آئل، ممنوعہ رنگ، امونیا اور کھلے مصالحے تلف کر دیئے گئے۔

ڈی جی فوڈ اتھارٹی عاصم جاوید کا کہنا ہے کہ یونٹ میں صفائی کے انتہائی ناقص انتظامات پائے گئے، دیواروں پر جالے لگے ہوئے تھے جبکہ بدبودار ماحول میں نمکو تیار کی جا رہی تھی، حفظانِ صحت کے اصولوں کی سنگین خلاف ورزی کی جا رہی تھی اور سابقہ دی گئی ہدایات پر بھی عملدرآمد نہیں کیا گیا۔

ان کا مزید کہنا تھا کہ ٹوٹے اور گندے فرش پر نمکو کی تیاری اور پیکنگ کی جا رہی تھی، نان فوڈ گریڈ برش استعمال ہو رہے تھے جبکہ ملازمین  نے قوانین کے خلاف انگوٹھیاں پہن رکھی تھیں، فوڈ ہینڈلرز کے میڈیکل اور ٹریننگ سرٹیفکیٹس بھی موقع پر موجود نہیں تھے۔

عاصم جاوید نے واضح کیا کہ بچوں کیلئے سنیکس تیار کرنے میں قوانین کی خلاف ورزی پر سخت کارروائی کی جائے گی اور کسی قسم کی رعایت نہیں برتی جائے گی، وزیر اعلیٰ کے ویژن کے مطابق جعلساز مافیا کے خلاف زیرو ٹالرنس پالیسی پر عمل کیا جا رہا ہے اور خوراک کی تیاری سے ترسیل تک مکمل چیکنگ کی جا رہی ہے۔

ڈی جی فوڈ اتھارٹی نے کہا کہ خوراک کے کاروبار سے وابستہ افراد مکمل ہدایات پنجاب فوڈ اتھارٹی کی ویب سائٹ سے حاصل کر سکتے ہیں، انہوں نے شہریوں پر بھی زور دیا کہ اشیاء کی خریداری سے قبل جانچ پڑتال یقینی بنائیں اور کسی بھی شکایت کی صورت میں فوڈ اتھارٹی کی ہیلپ لائن 1223 پر اطلاع دیں۔

Follow Lahore News on Facebook

Install our App